सातारा जिल्हा बँक निवडणूक : भाजपाचे वर्चस्व, राष्ट्रवादी, शिवसेनेची जोरदार मुसंडी!

खासदार-आमदारांच्या प्रतिष्ठेच्या लढतीत धक्कादायक निकाल, ईश्वरचिठ्ठीने ठरवला कोरेगावचा विजेता

DCC Bank election final result, winner candidate list, satara, shivshahi news,

शिवशाही वृत्तसेवा, सातारा (शुभम कोदे)

जिल्ह्याचे राजकीय लक्ष लागून राहिलेल्या सातारा जिल्हा मध्यवर्ती सहकारी बँकेच्या (SDCC Bank) मतमोजणीचे अंतिम निकाल जाहीर झाले आहेत. अत्यंत चुरशीच्या आणि प्रतिष्ठेच्या ठरलेल्या या निवडणुकीत भारतीय जनता पक्षाने (भाजपा) सर्वाधिक ९ जागांवर विजय मिळवत आपले वर्चस्व सिद्ध केले आहे. तर राष्ट्रवादी काँग्रेसने ८ आणि शिवसेनेने ४ जागांवर विजय मिळवून जोरदार मुसंडी मारली आहे.

प्रमुख लक्षवेधी निकाल आणि घडामोडी

कोरेगावमध्ये थरार : कोरेगाव सोसायटी मतदारसंघात राष्ट्रवादीचे सुनील माने आणि विरोधकांमध्ये अत्यंत अटीतटीची लढत पाहायला मिळाली. शेवटी टाय झाल्यामुळे काढण्यात आलेल्या ईश्वरचिठ्ठीवर सुनील माने विजयी घोषित झाले.

अर्जुन काळे यांचा अवघ्या ४० मतांनी विजय : जिल्ह्यात सर्वाधिक चर्चेत राहिलेल्या लढतीत भाजपचे आमदार जयकुमार गोरे यांचे समर्थक अर्जुन काळे (भटक्या विमुक्त प्रवर्ग) यांनी ९९९ मते मिळवून अवघ्या ४० मतांच्या फरकाने अपक्ष उमेदवार वाघ (९६० मते) यांचा पराभव केला.

OBC प्रवर्गात योगेश फडतरे : इतर मागासवर्गीय (OBC) प्रवर्गातून राष्ट्रवादी काँग्रेसचे योगेश फडतरे यांनी दणदणीत विजय संपादन केला.

पक्षनिहाय विजयी उमेदवारांची यादी
भारतीय जनता पक्ष (भाजपा) – ०९ जागा

माण सोसायटी : जयकुमार गोरे
जावळी सोसायटी : ज्ञानदेव रांजणे

सातारा सोसायटी : सर्जेराव सावंत
भटक्या विमुक्त प्रवर्ग : अर्जुन काळे

मजूर संस्था : चंद्रकांत जाधव
जनरल गट : डॉ. अतुल भोसले (बिनविरोध)

गृहनिर्माण संस्था : सोमनाथ धुमाळ (बिनविरोध)
पतसंस्था / पतपेढी गट : रणजितसिंह नाईक-निंबाळकर (बिनविरोध)

खटाव सोसायटी : नंदकुमार मोरे (बिनविरोध)

राष्ट्रवादी काँग्रेस – ०८ जागा
कराड सोसायटी : उदयसिंह पाटील-उंडाळकर

महाबळेश्वर सोसायटी : रूपाली राजापुरे
खंडाळा सोसायटी : अजय भोसले

कोरेगाव सोसायटी : सुनील माने (ईश्वरचिठ्ठीवर)
इतर मागासवर्ग (OBC) : योगेश फडतरे

वाई सोसायटी : सत्यजित वीर (बिनविरोध)
खरेदी-विक्री संघ : मकरंद पाटील (बिनविरोध)

महिला राखीव गट : ऋतुजा पाटील-वाठारकर (बिनविरोध)

शिवसेना – ०४ जागा
पाटण सोसायटी : गृहराज्यमंत्री शंभूराज देसाई

फलटण सोसायटी : संजीवराजे नाईक-निंबाळकर
अनुसूचित जाती गट : आमदार दीपक चव्हाण

महिला राखीव गट : मंगल पाटील

जिल्ह्याच्या राजकारणावर दूरगामी परिणाम

या निवडणुकीत बिनविरोध आलेल्या आणि प्रत्यक्ष मैदानात उतरलेल्या दिग्गज नेत्यांमुळे सहकार क्षेत्रातील ताकद पुन्हा एकदा अधोरेखित झाली आहे. भाजपाने ९ जागांसह अव्वल स्थान पटकावले असले, तरी राष्ट्रवादी (८) आणि शिवसेना (४) यांनी एकत्रितपणे जोरदार मुसंडी मारल्यामुळे आगामी काळात बँकेच्या अध्यक्ष व उपाध्यक्ष पदाच्या निवडीसाठी सत्तास्थापनेचे समीकरण अत्यंत रंजक ठरणार आहे.

-----------------