मुख्य सचिव राजेश अग्रवाल यांच्याकडून पंढरपुरात श्री विठ्ठल-रुक्मिणी दर्शन व चंद्रभागा घाट परिसराची पाहणी

७३ कोटींच्या विकासकामांचा घेतला आढावा - वारीत स्वच्छता आणि भाविकांच्या सुविधांना सर्वोच्च प्राधान्य देण्याचे प्रशासनाला निर्देश

Reviewed development works,Secretary Rajesh Aggarwal, Solapur, Pandharpur, shivshahi news.

शिवशाही वृत्तसेवा, पंढरपूर मनिषा कुलकर्णी

महाराष्ट्र राज्याचे मुख्य सचिव राजेश अग्रवाल यांनी पंढरपूर दौऱ्यादरम्यान श्री विठ्ठल-रुक्मिणी मातेचे सपत्नीक दर्शन घेतले. दर्शनानंतर त्यांनी चंद्रभागा नदी घाट तसेच मंदिर परिसराची सखोल पाहणी करून विविध विकासकामांचा आढावा घेतला. पंढरपूर आगमनानंतर प्रशासनाच्या वतीने सोलापूरचे जिल्हाधिकारी एस. कार्तिकेयन यांनी मुख्य सचिवांचे स्वागत केले.

चंद्रभागा घाट व स्वच्छता व्यवस्थेचा आढावा

पाहणी दौऱ्यादरम्यान मुख्य सचिवांनी चंद्रभागा घाटाची पाहणी करून नदीपात्रातील स्वच्छता, भाविकांसाठीच्या स्नान सुविधा आणि प्रकाश व्यवस्थेचा प्रत्यक्ष आढावा घेतला. आगामी आषाढी व कार्तिकी वारीच्या काळात पंढरपुरात येणाऱ्या लाखो भाविकांची गर्दी विचारात घेता पायाभूत सुविधांचा विस्तार करण्याचे स्पष्ट निर्देश त्यांनी दिले. यावर्षीच्या वारीमध्ये स्वच्छतेला सर्वोच्च प्राधान्य देऊन वारकऱ्यांना कोणत्याही प्रकारची गैरसोय होणार नाही, याची प्रशासनाने दक्षता घ्यावी, अशी सूचना त्यांनी केली.

श्री विठ्ठल-रुक्मिणी मंदिर परिसर व प्रस्तावित कॉरिडॉर

तीर्थक्षेत्र विकास आराखड्यांतर्गत ७३ कोटी रुपयांच्या निधीतून पूर्ण झालेल्या मंदिर विकास व सुशोभीकरणाच्या कामांची मुख्य सचिवांनी पाहणी केली. याप्रसंगी जिल्हाधिकारी एस. कार्तिकेयन यांनी प्रस्तावित 'श्री क्षेत्र पंढरपूर कॉरिडॉर' प्रकल्पाची सविस्तर माहिती दिली. या कॉरिडॉरमध्ये खालील महत्त्वाच्या सुविधांचा समावेश असणार आहे.

सुलभ दर्शन व प्रदक्षिणा मार्ग: भाविकांच्या सोयीसाठी सुलभ दर्शन मार्ग आणि प्रशस्त प्रदक्षिणा मार्गाची उभारणी.

पायाभूत सुविधा:भक्त निवास, बहुमजली पार्किंग, प्रसादालय, माहिती केंद्र व वैद्यकीय मदत कक्ष.

विशेष सोयी: वृद्ध आणि दिव्यांग भाविकांसाठी सुलभ व विशेष मार्ग.

सुरक्षा व्यवस्था: सुरक्षेच्या दृष्टीने स्वतंत्र प्रवेश व निर्गम मार्ग, संपूर्ण परिसरात सीसीटीव्ही आणि अत्याधुनिक अग्निशमन यंत्रणा.

गर्दी नियंत्रणासाठी AI तंत्रज्ञानाचा वापर

वारीच्या काळात होणारी प्रचंड गर्दी आणि वाहतूक व्यवस्था सुरक्षितपणे नियंत्रित करण्यासाठी पोलीस प्रशासनाकडून ए.आय. (AI) तंत्रज्ञानाचा प्रभावी वापर केला जाणार असल्याची माहिती सोलापूरचे पोलीस अधीक्षक अतुल कुलकर्णी यांनी दिली.

प्रशासकीय अधिकाऱ्यांची प्रमुख उपस्थिती

या पाहणी दौऱ्याप्रसंगी नगराध्यक्षा प्रणिता भालके, जिल्हा परिषदेचे मुख्य कार्यकारी अधिकारी कुशल जैन, पोलीस अधीक्षक अतुल कुलकर्णी, अपर जिल्हाधिकारी गणेश निऱ्हाळी, प्रांत अधिकारी सचिन इथापे, तहसीलदार सचिन लंगुंटे, नगरपालिकेचे मुख्याधिकारी महेश रोकडे आणि मंदिर समितीचे व्यवस्थापक प्रवीण घम यांच्यासह विविध शासकीय विभागांचे वरिष्ठ अधिकारी उपस्थित होते.

-----------------