डेटा ॲनालिटिक्स आणि मशीन लर्निंग विषयावर सिंहगडमध्ये एकदिवसीय चर्चासत्र

विद्यार्थ्यांनी उद्योगाभिमुख कौशल्ये आत्मसात करणे गरजेचे : डॉ. नामदेव सावंत

शिवशाही वृत्तसेवा प्रतिनिधी पंढरपूर

कोर्टी (ता. पंढरपूर) येथील एस. के. एन. सिंहगड कॉलेज ऑफ इंजिनिअरिंग महाविद्यालयातील 'कृत्रिम बुद्धिमत्ता (AI) आणि डेटा सायन्स' विभागाच्या वतीने विद्यार्थ्यांसाठी “डेटा ॲनालिटिक्स आणि मशीन लर्निंग” या महत्त्वपूर्ण व उदयोन्मुख विषयावर एकदिवसीय चर्चासत्राचे यशस्वी आयोजन करण्यात आले.

विद्यार्थ्यांना डेटा ॲनालिटिक्स व मशीन लर्निंग तंत्रज्ञानाचे प्रत्यक्ष जीवनातील उपयोग आणि या क्षेत्रातील वाढत्या करिअरच्या संधींबाबत व्यावहारिक ज्ञान मिळावे, हा या कार्यक्रमाचा प्रमुख उद्देश होता.

उद्योगातील कार्यपद्धती व करिअर संधींवर मार्गदर्शन

या चर्चासत्रासाठी हैदराबाद येथील 'फिक्सिटीएडएक्स स्टुडंट अपस्किलिंग अँड प्लेसमेंट्स'चे डेटा ॲनालिस्ट इंजिनिअर श्री. विकास पड्डा हे प्रमुख मार्गदर्शक म्हणून उपस्थित होते. त्यांनी विद्यार्थ्यांना डेटा-आधारित निर्णयप्रक्रिया, उद्योग क्षेत्रातील सध्याची कार्यपद्धती आणि मशीन लर्निंगच्या विविध उपयोगांवर सखोल मार्गदर्शन केले. तसेच या क्षेत्रात यशस्वी करिअर घडविण्यासाठी आवश्यक कौशल्यांची माहिती दिली.

व्यावहारिक ज्ञानाची गरज

कार्यक्रमाचे उद्घाटन AI & DS विभागाचे विभागप्रमुख डॉ. नामदेव सावंत यांच्या हस्ते पार पडले. याप्रसंगी बोलताना त्यांनी आजच्या तंत्रज्ञानाधारित युगात डेटा ॲनालिटिक्स व मशीन लर्निंगचे महत्त्व अधोरेखित केले. बदलत्या तंत्रज्ञानाच्या गरजा ओळखून विद्यार्थ्यांनी पुस्तकी ज्ञानासोबतच उद्योगाभिमुख कौशल्ये विकसित करावीत, असे आवाहन त्यांनी केले.

या चर्चासत्रामुळे द्वितीय वर्ष बी.टेक. AI & DS च्या विद्यार्थ्यांना उद्योग क्षेत्रातील तज्ज्ञांशी थेट संवाद साधण्याची आणि नवीनतम ट्रेंड्स व साधने समजून घेण्याची मोठी संधी मिळाली.

शिक्षकांचे मोलाचे सहकार्य

कार्यक्रमाचे संयोजन समन्वयक प्रा. प्रमोद माने यांनी केले. या उपक्रमासाठी महाविद्यालयाचे प्राचार्य डॉ. कैलाश करांडे, उपप्राचार्य डॉ. स्वानंद कुलकर्णी विभागप्रमुख डॉ. नामदेव सावंत यांच्यासह विभागातील सर्व शिक्षक व शिक्षकेतर कर्मचाऱ्यांचे मोलाचे सहकार्य लाभले. या व्याख्यानास द्वितीय वर्षाचे विद्यार्थी मोठ्या संख्येने उपस्थित होते.

-----------------