वरिष्ठांचा कथित मानसिक छळ आणि राजकीय दबावाच्या आरोपांदरम्यान डॉ. राजेंद्र रुपनवर यांचा मृत्यू

माळशिरस-फलटण परिसरात संतापाची लाट

Dr. Rajendra rupnavar suicide case, Phaltan government hospital, police, malshiras, Solapur, shivshahi news,

शिवशाही वृत्तसेवा,माळशिरस (प्रतिनिधी वैभव कुलकर्णी)

माळशिरस तालुक्यातील फडतरी गावचे सुपुत्र ,फलटण उपजिल्हा रुग्णालयातील वैद्यकीय अधिकारी पदावर कार्यरत असणारे, डॉ. राजेंद्र रुपनवर यांचा सोमवारी (३१ ऑगस्ट) उपचारादरम्यान दुर्दैवी मृत्यू झाला. २७ ऑगस्ट रोजी मुंबईतील सायन रेल्वे स्थानक परिसरात त्यांनी आत्महत्येचा प्रयत्न केल्याचे समोर आले होते. त्यानंतर त्यांना सायन रुग्णालयात उपचारासाठी दाखल करण्यात आले होते. मात्र, उपचार सुरू असतानाच त्यांची प्राणज्योत मालवली.

डॉ. रुपनवर यांच्या मृत्यूमुळे माळशिरस तालुक्यातील मांडवे, फडतरीसह फलटण परिसरात हळहळ व्यक्त होत असून, या घटनेमागील परिस्थितीची निष्पक्ष चौकशी करण्याची मागणी जोर धरत आहे.

बनावट प्रमाणपत्रासाठी दबाव आणल्याचा आरोप

उपलब्ध माहितीनुसार, गेल्या महिन्यात एका राजकीय पक्षाशी संबंधित व्यक्तींनी डॉ.रुपनवर यांच्यावर फिटनेस प्रमाणपत्र देण्यासाठी दबाव आणल्याचा आरोप आहे. प्रमाणपत्राबाबत संशय आल्याने त्यांनी ते देण्यास नकार दिल्यानंतर संबंधितांकडून शिवीगाळ आणि धक्काबुक्की झाल्याचेही सांगण्यात येत आहे.

या घटनेबाबत डॉ. रुपनवर यांनी वरिष्ठ अधिकाऱ्यांकडे तक्रार केल्याची माहिती आहे. मात्र, संबंधितांवर कारवाई करण्याऐवजी उलट डॉ. रुपनवर यांच्यावरच प्रशासकीय कारवाई करण्यात आल्याचा आरोप त्यांच्या कुटुंबीयांकडून आणि सहकाऱ्यांकडून केला जात आहे.

सोशल मीडियावरील व्हिडिओमुळे प्रकरण चर्चेत

कामाच्या ठिकाणी होत असलेल्या कथित मानसिक छळामुळे डॉ. रुपनवर मानसिकदृष्ट्या त्रस्त होते, असा दावा करण्यात येत आहे. त्यांनी सोशल मीडियावर व्हिडिओ प्रसारित करून आपल्यावरील अन्यायाला वाचा फोडल्याचेही समोर आले आहे. तसेच, त्यांनी हातावर काही व्यक्तींची नावे लिहून न्यायाची मागणी केल्याचे सांगण्यात येत आहे.

या सर्व घटनांमुळे त्यांच्या मृत्यूमागील परिस्थितीबाबत गंभीर प्रश्न उपस्थित झाले असून, या आरोपांची स्वतंत्र चौकशी होणे आवश्यक असल्याची मागणी होत आहे.

मामांनी कष्टाने घडविले डॉक्टर; कुटुंबावर दुःखाचा डोंगर

डॉ. रुपनवर यांच्यावरील आईचे छत्र लहानपणीच हरपले होते. त्यानंतर त्यांच्या मामांनी अत्यंत कष्ट आणि जिद्दीने त्यांचे शिक्षण पूर्ण करून त्यांना डॉक्टर बनवले. भाचा डॉक्टर झाल्याचा आनंद मामांनी पंचक्रोशीत तब्बल २५ किलो पेढे वाटून साजरा केला होता. मात्र, आज त्याच कर्तृत्ववान भाच्याच्या निधनाने कुटुंबीयांवर दुःखाचा डोंगर कोसळला आहे.

संतप्त नातेवाईकांचा अंत्यसंस्काराबाबत आक्रमक पवित्रा

डॉ. रुपनवर यांच्या मृत्यूची बातमी समोर आल्यानंतर संतप्त नातेवाईकांनी फलटण उपजिल्हा रुग्णालयासमोरच अंत्यसंस्कार करण्याचा पवित्रा घेतल्याने परिसरात तणावाचे वातावरण निर्माण झाले. त्यांच्या मृत्यूला कारणीभूत ठरलेल्या परिस्थितीची चौकशी करून दोषींवर कठोर कारवाई करावी, अशी मागणी नातेवाईक आणि नागरिकांकडून करण्यात येत आहे.

सेंट्रल मार्ड आणि बीएमसी मार्डकडून निष्पक्ष चौकशीची मागणी

डॉ. रुपनवर यांच्या मृत्यूच्या पार्श्वभूमीवर सेंट्रल मार्ड आणि बीएमसी मार्ड यांनी स्वतंत्र, निष्पक्ष आणि पारदर्शक चौकशीची मागणी केली आहे. डॉक्टरांना कामाच्या ठिकाणी मानसिक छळ, धमकी, दबाव, दडपशाही किंवा अनुचित बाह्य अथवा राजकीय हस्तक्षेपाचा सामना करावा लागला होता का, याची सखोल चौकशी करून सत्य परिस्थिती समोर आणावी, अशी भूमिका संघटनांनी घेतली आहे.

फलटणमध्ये डॉक्टरांशी संबंधित ही दुसरी गंभीर घटना असल्याचा दावा सेंट्रल मार्डकडून करण्यात आला आहे. त्यामुळे डॉक्टरांच्या सुरक्षिततेचा, मानसिक स्वास्थ्याचा आणि कामाच्या वातावरणाचा प्रश्न पुन्हा ऐरणीवर आला आहे.

वैद्यकीय अधीक्षक डॉ.लीला मदने निलंबित

दरम्यान, या प्रकरणात फलटण उपजिल्हा रुग्णालयाच्या वैद्यकीय अधीक्षक डॉ. लीला मदने यांचे नाव चर्चेत आल्यानंतर जिल्हा शल्यचिकित्सकांकडून चौकशी समिती नियुक्त करण्यात आली होती. डॉ. रुपनवर यांच्या तक्रारीच्या अनुषंगाने झालेल्या चौकशीत डॉ. मदने दोषी आढळल्याचे सांगण्यात येत असून, त्यांच्यावर सोमवारी निलंबनाची कारवाई करण्यात आल्याची माहिती आहे.

मात्र, या प्रकरणातील इतर गंभीर आरोप अद्याप अंतिम चौकशीअंती सिद्ध झालेले नाहीत. त्यामुळे सर्व संबंधितांची बाजू ऐकून, पुराव्यांच्या आधारे स्वतंत्र आणि पारदर्शक चौकशी होणे महत्त्वाचे आहे.

डॉक्टरांच्या सुरक्षित कार्यपरिसराबाबत गंभीर प्रश्न

डॉ. राजेंद्र रुपनवर यांच्या मृत्यूने डॉक्टरांना कामाच्या ठिकाणी कोणत्याही प्रकारच्या धमकी, मानसिक छळ, दबाव अथवा अनुचित हस्तक्षेपाला सामोरे जावे लागू नये, यासाठी प्रभावी यंत्रणा उभारण्याची गरज अधोरेखित झाली आहे.

डॉ. रुपनवर यांच्या मृत्यूमागील नेमकी परिस्थिती काय होती? त्यांच्यावर दबाव आणला गेला होता का? त्यांच्या तक्रारीवर प्रशासनाने योग्य वेळी कारवाई केली होती का? बाह्य अथवा राजकीय हस्तक्षेप झाला होता का? या सर्व प्रश्नांची उत्तरे आता निष्पक्ष चौकशीतूनच समोर येणे अपेक्षित आहे.

डॉ. राजेंद्र रुपनवर यांच्या अकाली निधनाने वैद्यकीय क्षेत्रासह माळशिरस आणि फलटण परिसरात शोककळा पसरली आहे. शासनाने या प्रकरणाची सखोल, स्वतंत्र आणि पारदर्शक चौकशी करून सत्य जनतेसमोर आणावे आणि दोषी आढळणाऱ्यांवर कायद्यानुसार कठोर कारवाई करावी, अशी मागणी जोर धरत आहे.

-----------------