वाईत ५ मेडिकल दुकाने फोडणारा अट्टल चोरटा २४ तासांत जेरबंद - पोलिसांच्या धडक कारवाईने व्यापाऱ्यांना दिलासा

पोलीस ठाण्याजवळच घातला होता धुमाकूळ - आरोपी कैलास कदमला बेड्या

Thief arrested in 24 hours, robbery in medical store, police action, Wai, satara, shivshahi news,

शिवशाही वृत्तसेवा, वाई (प्रतिनिधी शुभम कोदे)

वाई शहरात एकाच रात्री पाच मेडिकल दुकाने फोडून धुमाकूळ घालणाऱ्या अट्टल चोरट्याचा वाई पोलिसांनी अवघ्या २४ तासांच्या आत पर्दाफाश केला आहे. या प्रकरणी कैलास विष्णू कदम (वय ३४, रा. मालतपूर-पसरणी, ता. वाई) याला अटक करण्यात आली असून त्याच्याकडून चोरीसाठी वापरलेली हत्यारे जप्त करण्यात आली आहेत. पोलिसांच्या या जलद आणि धडक कारवाईमुळे शहरातील व्यापारी व नागरिकांमधून समाधान व्यक्त केले जात आहे.

पहाटेचा धुमाकूळ अन् नागरिकांमध्ये भीती

शुक्रवारी पहाटेच्या सुमारास अज्ञात चोरट्यांनी वाई शहरातील पोलीस ठाण्यापासून हाकेच्या अंतरावर असलेली तब्बल पाच मेडिकल दुकाने एकामागून एक फोडली. चोरट्यांनी दुकानांचे शटर उचकटून प्रत्येकी २ ते ५ हजार रुपयांची रोकड लंपास केली होती. याच रात्री बावधन नाक्यावरील 'हर्ष बार' फोडण्याचाही अपयशी प्रयत्न करण्यात आला. ही संपूर्ण घटना सीसीटीव्ही कॅमेऱ्यात कैद झाली होती. पोलीस ठाण्याजवळच झालेल्या या धाडसी चोऱ्यांमुळे पोलिसांच्या गस्तीवर प्रश्नचिन्ह उपस्थित करत व्यापाऱ्यांमध्ये तीव्र नाराजी व भीतीचे वातावरण पसरले होते.

भारतीय न्याय संहितेनुसार गुन्हा दाखल

चोरीच्या या मालिकेप्रकरणी १४ ऑगस्ट २०२६ रोजी वाई पोलीस ठाण्यात 'भारतीय न्याय संहिते'नुसार गुन्हा दाखल करण्यात आला. घटनेचे गांभीर्य ओळखून पोलीस प्रशासनाने तातडीने तपासाची चक्रे वेगाने हालवली.

अशी झाली थरारक कारवाई

पोलीस अधीक्षक निखिल पिंगळे, अप्पर पोलीस अधीक्षक डॉ. वैशाली कडुकर आणि उपविभागीय पोलीस अधिकारी सुनील साळुंखे यांच्या मार्गदर्शनाखाली वाई पोलीस ठाण्याचे पोलीस निरीक्षक प्रदीप सूर्यवंशी यांनी गुन्हे प्रकटीकरण पथकाला तपासाचे आदेश दिले. तपास पथकाचे प्रमुख पोलीस उपनिरीक्षक अमित सुर्वे व त्यांच्या टीमने खबऱ्यांचे जाळे सक्रिय केले. आरोपी गुरेबाजार झोपडपट्टी (सिद्धनाथवाडी, वाई) येथे असल्याची पक्की माहिती मिळताच पोलिसांनी तेथे छापा टाकला. पोलिसांना पाहताच पळून जाण्याच्या प्रयत्नात असलेल्या संशयिताचा पाठलाग करून पथकाने त्याला जागीच ताब्यात घेतले.

गुन्ह्याची कबुली अन् हत्यारे जप्त

ताब्यात घेतलेल्या इसमाकडे कसून चौकशी केली असता, त्याने आपले नाव कैलास विष्णू कदम असल्याचे सांगत चोऱ्यांची कबुली दिली. त्याची अंगझडती घेतली असता, गुन्ह्यात वापरलेली हातोडी आणि पक्कड जप्त करण्यात आली आहे. या चोऱ्यांमध्ये त्याचा आणखी कोणी साथीदार आहे का, याचा शोध आता पोलीस घेत आहेत. या धडक कारवाईत पोलीस हवालदार लेंभे, पोलीस कॉन्स्टेबल विक्रम धोत्रे, नितीन कदम, हेमंत शिंदे आणि विशाल शिंदे यांच्या पथकाने महत्त्वाची भूमिका बजावली. या प्रकरणाचा पुढील तपास पोलीस हवालदार लेंभे करत आहेत. २४ तासांत आरोपीला गजाआड केल्याबद्दल वाई पोलीस पथकाचे शहरातून कौतुक होत आहे.