धर्मपुरी-शिंदेवाडी आणि बारामती-शिंदेवाडी महत्वपूर्ण रस्त्यांच्या दुरवस्थेबाबत ग्रामस्थांचे साकडे

रखडलेली कामे तातडीने मार्गी लावण्याचे ॲड. राहुल वाघमोडे-पाटील यांचे आश्वासन

The deplorable condition of the road, Solapur, malshiras, shivshahi news.

शिवशाही वृत्तसेवा, माळशिरस (प्रतिनिधी वैभव कुलकर्णी)

माळशिरस तालुक्यातील धर्मपुरी ते शिंदेवाडी (गणेश मंदिर ते शिंदेवाडी) आणि बारामती-शिंदेवाडी दरम्यानच्या अत्यंत खराब व जीवघेण्या बनलेल्या रस्त्याबाबत ग्रामस्थांनी तीव्र नाराजी व्यक्त करत या प्रश्नी लक्ष घालण्याची विनंती केली आहे. या दोन्ही रस्त्यांच्या संदर्भात अनेक वेळा निवेदने व मीडिया माध्यमांतून आवाज उठवला आहे.माळशिरस तालुक्याच्या दौऱ्यावर आलेले महाराष्ट्राचे उपमुख्यमंत्री मा. श्री. एकनाथ शिंदे यांचे (PSO) ॲड. राहुल (दादा) वाघमोडे-पाटील यांनी शिंदेवाडी येथे सदिच्छा भेट दिली. याप्रसंगी युवा वर्ग व ग्रामस्थांच्या वतीने त्यांचा यथोचित सन्मान करण्यात आला.

रस्त्याची दुरवस्था आणि एसटी बस सेवेबाबत गंभीर चर्चा

सदिच्छा भेटीदरम्यान ग्रामस्थांनी धर्मपुरी-शिंदेवाडी अपूर्ण अवस्थेतील रस्ता, गणेश मंदिर ते शिंदेवाडी खड्डेमय रस्ता, तसेच बारामती-शिंदेवाडी(पवारवाडी-हणमंतवाडी मार्गे) महत्वपूर्ण रस्त्याच्या बिकट परिस्थितीकडे ॲड. राहुल वाघमोडे-पाटील यांचे लक्ष वेधले. या मार्गावरील खड्ड्यांमुळे शालेय विद्यार्थी, महिला, गावातील उद्योजक-व्यावसायिक, शेतकरीवर्ग, रुग्ण आणि ज्येष्ठ नागरिकांना नाहक त्रास सहन करावा लागत असून अपघाताचा धोका वाढल्याची खंत ग्रामस्थांनी व्यक्त केली.

याची गंभीर दखल घेत ॲड. राहुल वाघमोडे-पाटील यांनी धर्मपुरी ते शिंदेवाडी मार्गावरील रस्त्यांचे उर्वरित लेअर व खड्डेमय झालेली कामे दर्जेदार पद्धतीने तातडीने मार्गी लावण्याचे निर्देश संबंधित विभागाला दिले. पावसाळ्याची वाट न बघता किंवा तांत्रिक कारणे पुढे न करता रखडलेले हे काम प्राधान्याने पूर्ण करण्यासाठी उपमुख्यमंत्री एकनाथ शिंदे यांच्या माध्यमातून तातडीने पूर्ण करण्याचे आश्वासन त्यांनी यावेळी दिले.

प्रमुख मागण्यांवर सकारात्मक चर्चा

एसटी बस सेवा: बारामती-शिंदेवाडी एसटी बस सेवा बंद असल्यामुळे विद्यार्थी, कर्मचारी व नागरिकांचे होत असलेले हाल हा कळीचा मुद्दा या चर्चेत प्रकर्षाने मांडण्यात आला.

इतर विकासकामे: हनुमान विद्यालय शिंदेवाडी येथील स्टेज सभा मंडप आणि स्मशानभूमीतील पेव्हर ब्लॉक

बसविणे व पत्रा-शेड आदी मागण्यांवरही सकारात्मक चर्चा झाली.

उपमुख्यमंत्री महोदयांच्या माध्यमातून हे सर्व प्रश्न लवकरात लवकर मार्गी लावले जातील, असा विश्वास ॲड. राहुल वाघमोडे-पाटील यांनी दिला. या सकारात्मक भूमिकेमुळे ग्रामस्थांमध्ये समाधान व्यक्त करण्यात आले.

या प्रसंगी प्रविणकाका रणवरे, विरेंद्र दादा शिंदे,DG रणवरे, अमित भैय्या घाडगे, राहुल तनपुरे, मदन रणवरे, विक्रम भगत, पिंटू जगदाळे, छगन रुपनवर यांच्यासह परिसरातील मान्यवर, ग्रामस्थ आणि तरुण वर्ग मोठ्या संख्येने उपस्थित होता.

-----------------