इस्त्रो भेटीसाठी झेप

जि.प. शाळेच्या रोहन देशमुखची बंगळुरू येथील ‘इस्रो’ संशोधन केंद्रासाठी निवड

Selection for ISRO research center, Solapur, malshiras, shivshahi news.

शिवशाही वृत्तसेवा,माळशिरस (वैभव कुलकर्णी प्रतिनिधी)

तालुक्यातील जि.प. प्राथमिक शाळा देशमुखवाडी येथील होतकरू विद्यार्थी कु. रोहन सुरज देशमुख याची ‘टॅलेंट हंट’ स्पर्धा परीक्षेच्या माध्यमातून थेट बंगळुरू येथील भारतीय अंतराळ संशोधन संस्था (ISRO - इस्रो) या जागतिक दर्जाच्या अवकाश संशोधन केंद्रास भेट देण्यासाठी निवड झाली आहे. त्याच्या या राष्ट्रीय पातळीवरील यशामुळे देशमुखवाडी गावाच्या शिरपेचात मानाचा तुरा रोवला गेला आहे.

यशाचे श्रेय आणि मार्गदर्शन

रोहनच्या या दैदिप्यमान यशामागे त्याच्या आई-वडिलांचे संस्कार आणि कठोर परिश्रम आहेत. तसेच शाळेचे मुख्याध्यापक श्री. माळवे सर आणि सहशिक्षक श्री. साळवे सर यांचे मोलाचे मार्गदर्शन, सातत्यपूर्ण अभ्यास व प्रोत्साहन लाभल्यामुळेच रोहनला हे यश संपादन करणे शक्य झाले आहे. ग्रामीण भागातील एका जिल्हा परिषद शाळेच्या विद्यार्थ्याने मिळवलेल्या या यशाबद्दल सर्वत्र कौतुक होत आहे.

रोहनच्या या गौरवास्पद यशाबद्दल देशमुखवाडी ग्रामस्थ तसेच शाळा व्यवस्थापन समिती यांच्या वतीने त्याचे पुष्पगुच्छ देऊन विशेष सत्कार करण्यात आला व उज्ज्वल भविष्यासाठी त्याला हार्दिक शुभेच्छा देण्यात आल्या.

रोहनच्या या यशाने जि.प. शाळेतील इतर विद्यार्थी व पालकांमध्येही उत्साहाचे वातावरण निर्माण झाले असून, जिद्दीच्या व कष्टाच्या बळावर ग्रामीण मुलेही उच्च शिखरे सर करू शकतात, हे रोहनने पुन्हा एकदा सिद्ध करून दाखवले आहे.

-----------------