विद्यार्थ्यांच्या आरोग्यासाठी जागृतीचा ध्यास

श्री संत ज्ञानेश्वर विद्या मंदिरात आरोग्य जनजागृती शिबिर उत्साहात संपन्न

Health Awareness Camp, chatrapati Sambhaji Nagar, Kannad, shivshahi news.

शिवशाही वृत्तसेवा,कन्नड (प्रतिनिधी मनोज चव्हाण)

विद्यार्थ्यांचे आरोग्य सुदृढ राहावे आणि त्यांच्यामध्ये आरोग्यदायी जीवनशैलीच्या सवयी रुजाव्यात, या उद्देशाने श्री संत ज्ञानेश्वर विद्या मंदिर, शिवनगर, कन्नड येथे विद्यार्थ्यांसाठी आरोग्य जनजागृती शिबिराचे आयोजन करण्यात आले. वैद्यकीय अधिकारी कु. मुस्कान शब्बीर शेख व डॉ. राजश्री भगत यांच्या मार्गदर्शनाखाली हे शिबिर उत्साहात पार पडले.

यावेळी विद्यार्थ्यांना वैयक्तिक स्वच्छता, संतुलित आहार, नियमित व्यायाम, स्वच्छ परिसर, आरोग्यदायी दिनचर्या तसेच विविध आजारांपासून बचाव करण्यासाठी घ्यावयाची आवश्यक काळजी याबाबत सविस्तर मार्गदर्शन करण्यात आले.

‘निरोगी शरीरातच निरोगी मनाचा वास असतो आणि निरोगी मनामुळेच विद्यार्थ्यांची शैक्षणिक प्रगती अधिक प्रभावी होते,’ याबाबत विद्यार्थ्यांना मार्गदर्शन करत आरोग्याची काळजी घेण्याचे आवाहन करण्यात आले.

विद्यार्थ्यांनीही शिबिराला उत्स्फूर्त प्रतिसाद देत आरोग्यविषयक विविध प्रश्न विचारून आपल्या शंकांचे निरसन करून घेतले. या उपक्रमामुळे विद्यार्थ्यांमध्ये आरोग्याबाबत सकारात्मक दृष्टिकोन निर्माण होऊन निरोगी जीवनशैली अंगीकारण्याची प्रेरणा मिळाली.

शिबिराच्या यशस्वी आयोजनाबद्दल शाळेच्या वतीने वैद्यकीय अधिकारी कु. मुस्कान शब्बीर शेख व डॉ. राजश्री भगत यांचे मुख्याध्यापक श्री. प्रकाश जिरेमाळी तसेच सर्व शिक्षक व शिक्षकेतर कर्मचाऱ्यांनी आभार व्यक्त केले.

-----------------