करमाळा पोलिसांची पांगरे हद्दीत 'सर्जिकल स्ट्राइक'; पजेरो कारसह १० लाखांचा गांजा जप्त, तस्कर जाळ्यात

स्मशानभूमीजवळ सापळा रचून कारवाई :- माढ्यातील २४ वर्षीय तरुणाला रंगेहात बेड्या

Ganja worth Rs 10 lakh seized, Solapur, karmala, shivshahi news .

शिवशाही वृत्तसेवा, करमाळा (प्रतिनिधी वैभव कुलकर्णी)

करमाळा तालुक्यातील पांगरे हद्दीत आलिशान पजेरो स्पोर्ट कारमधून गांजाची बेकायदेशीर तस्करी करणाऱ्या टोळीचा करमाळा पोलिसांनी पर्दाफाश केला आहे. पोलीस पथकाने अत्यंत गुप्तपणे स्मशानभूमीजवळ सापळा रचून ही धडाकेबाज कारवाई केली. या कारवाईत पोलिसांनी २ लाख ५२ हजार ५०० रुपये किमतीचा १० किलो १०० ग्रॅम ओलसर गांजा आणि ८ लाख रुपये किमतीची सिल्व्हर रंगाची पजेरो कार असा एकूण १० लाख ५२ हजार ५०० रुपयांचा मुद्देमाल जप्त केला आहे.

अंधाराचा फायदा घेण्याचा प्रयत्न; पोलिसांनी चहूबाजूंनी घेरले!

मिळालेल्या माहितीनुसार, गुरुवारी (१७ जुलै) रात्रीच्या सुमारास टेंभुर्णी ते जेजुरी रोडवरील पांगरे येथील स्मशानभूमीजवळ एक तरुण आलिशान कारमधून गांजा विक्रीसाठी येणार असल्याची पक्की टीप करमाळा पोलीस ठाण्याचे पोलीस उपनिरीक्षक संदीप बनकर यांना मिळाली होती.

माहितीचे गांभीर्य ओळखून वरिष्ठांच्या रीतसर परवानगीने पोलिसांनी शासकीय पंचांसह पांगरे हद्दीत रात्री ८:५० च्या सुमारास नाकाबंदी व सापळा रचला. रात्रीच्या अंधारात संशयित पजेरो स्पोर्ट कार (क्र. MH-12-KF-9899) थांबलेली दिसताच, पोलीस पथकाने क्षणाचाही विलंब न लावता कारला चहूबाजूंनी घेराव घातला आणि चालकाला जागीच ताब्यात घेतले.

तस्कराची ओळख आणि जप्त मुद्देमाल

कारची पंचांसमक्ष कसून झडती घेतली असता, कारमध्ये ५ प्लास्टिकच्या पिशव्यांमध्ये भरलेला १० किलो १०० ग्रॅम वजनाचा ओलसर गांजा आढळून आला. बाजारात या गांजाची किंमत प्रति किलो २५ हजार रुपये असल्याचे सांगण्यात

येत आहे.

अटक आरोपी: रोहित शिवाजी केचे (वय २४, रा. गारअकोले, ता. माढा, जि. सोलापूर)

जप्त मुद्देमाल:

१० किलो १०० ग्रॅम गांजा (किंमत: ₹२,५२,५००)

पजेरो स्पोर्ट कार (किंमत: ₹८,००,०००)

एकूण जप्त माल: ₹१०,५२,५००

एनडीपीएस (NDPS) ॲक्टनुसार गुन्हा दाखल

या धडक कारवाई प्रकरणी पोलीस कॉन्स्टेबल गणेश लालासाहेब शिंदे (बॅच क्र. २१४२) यांनी दिलेल्या फिर्यादीवरून आरोपी रोहित केचे याच्यावर करमाळा पोलीस ठाण्यात गुन्हा रजि. नं. ६४४/२०२६, एन.डी.पी.एस. ॲक्ट (NDPS Act) कलम ८(क) व २०(ब)(II)(ब) अन्वये गुन्हा दाखल करण्यात आला आहे. या तस्करीत आणखी कोणाकोणाचा हात आहे? हा गांजा कोठून आणला आणि कोणाला विकला जाणार होता? याचा पुढील कसून तपास सहाय्यक पोलीस निरीक्षक दिलीप ढेरे करत आहेत.

वरिष्ठांचे मार्गदर्शन आणि कारवाई करणारे पोलीस पथक

ही धडाकेबाज कामगिरी सोलापूर ग्रामीणचे पोलीस अधीक्षक अतुल कुलकर्णी (भा.पो.से.), अप्पर पोलीस अधीक्षक विजय कबाडे, करमाळा विभागाच्या सहाय्यक पोलीस अधीक्षक अंजना कृष्णा व्ही.एस. (भा.पो.से.) यांच्या मार्गदर्शनाखाली पार पडली.

कारवाईत सहभागी पथक:

करमाळा पोलीस ठाण्याचे पोलीस निरीक्षक रणजीत माने, सहाय्यक पोलीस निरीक्षक दिलीप ढेरे, पोलीस उपनिरीक्षक संदीप बनकर, पोलीस अंमलदार दुष्यंत ढेंबरे, लोहार, अलिममलिक शेख, अर्जुन गोसावी, गणेश शिंदे, रमेश फुगे, चेतन पवार आणि ज्योतीराम बारकुंड.

करमाळा पोलिसांनी केलेल्या या कारवाईमुळे तालुक्यातील अमली पदार्थ तस्करांचे धाबे दणाणले असून नागरिकांमधून पोलिसांचे कौतुक होत आहे.

---------------------