डीसीसी बँक निवडणूक मोहिते-पाटलांचा होकार की स्वतंत्र लढतीचा इशारा? डीसीसी बँकेच्या निवडणुकीत रंगणार सत्तासंघर्ष

भाजपसोबत समेट झाल्यास सोलापूर DCC बँकेचे संचालक मंडळ बिनविरोध होण्याची शक्यता

DCC cooperative Bank election, BJP, jaykumar gore, mohite patil, Solapur, shivshahi news,

शिवशाही वृत्तसेवा, सोलापूर (प्रतिनिधी वैभव कुलकर्णी)

सोलापूर जिल्हा मध्यवर्ती सहकारी बँकेच्या आगामी निवडणुकीची राजकीय रंगत वाढू लागली असून, माळशिरसच्या मोहिते-पाटील घराण्याची भूमिका या निवडणुकीत निर्णायक ठरण्याची शक्यता आहे. पालकमंत्री जयकुमार गोरे आणि खासदार धैर्यशील मोहिते-पाटील यांच्यातील राजकीय संघर्षाच्या पार्श्वभूमीवर आता सहकाराच्या मैदानातही दोन्ही बाजूंची रणनीती कसोटीला लागणार आहे.

भाजप आपल्या पॅनेलमध्ये मोहिते-पाटील गटाला कितपत सामावून घेते, माजी आमदार रणजितसिंह मोहिते-पाटील आणि खासदार धैर्यशील मोहिते-पाटील कोणता राजकीय पवित्रा घेतात, यावर निवडणुकीतील चुरस मोठ्या प्रमाणात अवलंबून राहणार आहे. दोन्ही गटांमध्ये तडजोडीचा फॉर्म्युला निश्चित झाला, तर अनेक मतदारसंघांतील संभाव्य संघर्ष टाळून संचालक मंडळाची निवडणूक बिनविरोध करण्याचा मार्गही मोकळा होऊ शकतो.

माळशिरसचा ‘फॅक्टर’ ठरणार निर्णायक

माळशिरस तालुका हा मोहिते-पाटील यांच्या राजकीय आणि सहकारी संस्थांवरील प्रभावाचा महत्त्वाचा केंद्रबिंदू मानला जातो. सहकार महर्षी स्व. शंकरराव मोहिते-पाटील यांच्या कार्यानंतर माजी उपमुख्यमंत्री विजयसिंह मोहिते-पाटील यांनी १९७९ ते २०१८ या कालावधीत तब्बल ३९ वर्षे बँकेच्या संचालकपदाची जबाबदारी सांभाळली. त्यामुळे जिल्हा बँकेच्या राजकारणात या घराण्याचा दीर्घकाळ प्रभाव राहिला आहे.

माळशिरस तालुक्यातील १४५ विविध कार्यकारी सेवा सहकारी संस्थांपैकी १४१ संस्था मतदानासाठी पात्र असल्याचे सांगितले जाते. यातील सुमारे १०० संस्थांवर मोहिते-पाटील गटाचा प्रभाव असल्याचा दावा केला जात आहे. त्यामुळे सोसायटी मतदारसंघात या गटाची ताकद दुर्लक्षित करणे कोणत्याही राजकीय समीकरणासाठी सोपे राहणार नाही.

केवळ सोसायटी मतदारसंघापुरताच हा प्रभाव मर्यादित नसून, पणन/शेतमाल प्रक्रिया आणि दूध संस्था या मतदारसंघांमध्येही मोहिते-पाटील गटाचे संख्याबळ महत्त्वाचे ठरण्याची शक्यता आहे. या तीन मतदारसंघांमध्ये किती जागांवर दावा करायचा, यावर भाजप आणि मोहिते-पाटील यांच्यातील संभाव्य जागावाटपाचे गणित ठरणार आहे.

राम सातपुतेंची वेगळी रणनीती

माळशिरस सोसायटी मतदारसंघात मोहिते-पाटील गटाशी थेट लढत देणे भाजपसाठी आव्हानात्मक ठरू शकते. त्यामुळे माजी आमदार राम सातपुते यांनी अनुसूचित जाती/जमाती मतदारसंघातून निवडणुकीची तयारी सुरू केल्याचे चित्र आहे.

सातपुते हे नातेपुते विविध कार्यकारी सेवा सहकारी संस्थेचे सभासद व संचालक असून, संस्थेचे कर्ज फेडून त्यांनी संचालकपदासाठी आवश्यक निकष पूर्ण केल्याचे सांगितले जाते. भाजपच्या पॅनेलमध्ये त्यांना संधी मिळण्याची शक्यता असल्याने या मतदारसंघातील राजकीय हालचालींनाही वेग आला आहे.

सहा मतदारसंघांत राजकीय समीकरणांची परीक्षा

अक्कलकोट, दक्षिण सोलापूर, सांगोला, बार्शी, करमाळा आणि माळशिरस या सहा सोसायटी मतदारसंघांमध्ये नव्या राजकीय समीकरणांचा प्रभाव जाणवण्याची शक्यता आहे. येथे स्थानिक नेत्यांची ताकद, संस्थांवरील प्रभाव आणि प्रमुख राजकीय पक्षांमधील संभाव्य आघाड्या यांचा निवडणुकीच्या निकालावर थेट परिणाम होऊ शकतो.

दुसरीकडे मोहोळमध्ये माजी आमदार राजन पाटील, उत्तर सोलापूरमध्ये माजी आमदार दिलीप माने, माढ्यात माजी आमदार संजयमामा शिंदे, पंढरपुरात माजी आमदार प्रशांत परिचारक आणि मंगळवेढ्यात माजी उपाध्यक्ष बबनराव आवताडे यांचा प्रभाव अद्याप महत्त्वाचा मानला जात आहे. त्यामुळे प्रत्येक मतदारसंघात स्थानिक राजकीय ताकदीचे स्वतंत्र गणित तयार होणार आहे.

‘समेट’ झाला तर बिनविरोधाचा मार्ग?

डीसीसी बँकेच्या निवडणुकीत राजकीय पक्षांपेक्षा सहकारी संस्थांवरील नियंत्रण आणि स्थानिक नेत्यांचे नेटवर्क अधिक प्रभावी ठरण्याची शक्यता आहे. त्यामुळे भाजप आणि मोहिते-पाटील गट यांच्यातील संभाव्य समझोता हा निवडणुकीतील सर्वात मोठा ‘गेमचेंजर’ ठरू शकतो.

जागावाटपावर दोन्ही बाजूंमध्ये सहमती झाली आणि प्रमुख स्थानिक नेत्यांना सामावून घेणारे व्यापक पॅनेल उभे राहिले, तर विरोधकांसमोर स्वतंत्र पॅनेल उभे करण्याचे आव्हान निर्माण होईल. परिणामी, जिल्हा बँकेचे नवे संचालक मंडळ बिनविरोध निवडण्याची शक्यताही राजकीय वर्तुळात चर्चेत आहे.

मात्र मोहिते-पाटील गटाने स्वतंत्र भूमिका घेतली किंवा जागावाटपावर तडजोड झाली नाही, तर माळशिरससह इतर महत्त्वाच्या मतदारसंघांत थेट लढती रंगण्याची शक्यता आहे. त्यामुळे डीसीसी बँकेच्या निवडणुकीत खरी चुरस किती असेल, याचे उत्तर मतपेटीत नव्हे, तर त्याआधी होणाऱ्या राजकीय वाटाघाटींमध्ये दडलेले आहे.

-----------------