१२ वीच्या विद्यार्थ्यांनी दिला यशाचा कानमंत्र
शिवशाही वृत्तसेवा,वाई प्रतिनिधी शुभम कोदे
शिक्षण म्हणजे केवळ गुणांची शर्यत नसून विद्यार्थ्यांच्या व्यक्तिमत्त्वाला योग्य दिशा देणारी प्रक्रिया आहे, याची प्रचिती सुमन एज्युकेशन संस्थेच्या दिशा ज्युनिअर कॉलेज, वाई येथे आयोजित करण्यात आलेल्या प्रवेशोत्सव कार्यक्रमातून आली. इयत्ता ११ वीच्या नवागत विद्यार्थ्यांचे स्वागत यावेळी इयत्ता १२ वीच्या विद्यार्थ्यांनी उत्साहात व आपुलकीच्या वातावरणात केले.
नवीन कॉलेज, नवीन मित्र, नवीन शिक्षक आणि नवीन अभ्यासक्रम यामुळे अनेक विद्यार्थी सुरुवातीला संभ्रमित व घाबरलेले असतात. ही भीती दूर करून त्यांच्यामध्ये आत्मविश्वास निर्माण करण्याच्या उद्देशाने १२ वीच्या विद्यार्थ्यांनी नवागतांना मार्गदर्शन केले. “घाबरू नका, आम्ही तुमच्या पाठीशी आहोत. दिशा हे आता तुमचे दुसरे घर आहे,” असा विश्वास त्यांनी विद्यार्थ्यांना दिला.
कार्यक्रमात मागील वर्षातील बारावी बोर्ड, एमएचटी-सीईटी, जेईई तसेच इतर स्पर्धा परीक्षांमध्ये उल्लेखनीय यश मिळवलेल्या गुणवंत विद्यार्थ्यांचा सत्कार करण्यात आला. या विद्यार्थ्यांनी आपल्या यशामागील मेहनत, अभ्यासाचे नियोजन, वेळेचे व्यवस्थापन आणि आलेल्या अडचणींवर मात करण्याचा प्रवास नवागतांसमोर उलगडला. “कष्टाला पर्याय नाही” हा यशाचा मूलमंत्र त्यांनी विद्यार्थ्यांना दिला.
यावेळी विद्यार्थ्यांना अकरावी-बारावीच्या दोन वर्षांचे महत्त्व पटवून देण्यात आले. कॉलेज जीवन म्हणजे केवळ मौजमजा किंवा गमती-जमती नसून भविष्यातील करिअरचा पाया घालणारा अत्यंत महत्त्वाचा टप्पा आहे, असे सांगण्यात आले. शिस्त, नियमित अभ्यास, वेळेचे योग्य नियोजन आणि ध्येय निश्चिती यांमुळेच यश संपादन करता येते, यावर वक्त्यांनी भर दिला.
दिशा कॉलेजची शिस्त, गुणवत्तापूर्ण शिक्षण, स्पर्धा परीक्षांसाठीचे मार्गदर्शन आणि समाजाभिमुख उपक्रमांची माहितीही नवागतांना देण्यात आली. रक्तदान शिबिरे, वक्तृत्व स्पर्धा, स्नेहसंमेलन तसेच विविध सामाजिक उपक्रमांद्वारे येथे केवळ विद्यार्थी नव्हे तर जबाबदार नागरिक घडवले जातात, हेही यावेळी अधोरेखित करण्यात आले.
सिनिअर-ज्युनिअरमधील दरी मिटवत मैत्री, मार्गदर्शन आणि सहकार्याची भावना निर्माण करणे, तसेच नेतृत्वगुण आणि जबाबदारीची जाणीव विद्यार्थ्यांमध्ये रुजवणे हा या प्रवेशोत्सवामागील मुख्य हेतू असल्याचे यावेळी सांगण्यात आले. “आज आम्ही तुमचे स्वागत करत आहोत; पुढील वर्षी तुम्हीच नव्या विद्यार्थ्यांचे स्वागत करणार आहात,” असा प्रेरणादायी संदेश देत कार्यक्रमाची सांगता करण्यात आली.
सुमन एज्युकेशन संस्थेच्या दिशा ज्युनिअर कॉलेजच्या यशस्वी वाटचालीमागे संस्थापक अध्यक्ष प्रा. डॉ. नितीन कदम व संचालिका प्रा. रूपाली कदम यांचे दूरदृष्टीपूर्ण मार्गदर्शन लाभत असून, प्राचार्य ताजुद्दीन सय्यद, ॲडमिन हेड सारिका चव्हाण व अकॅडमी हेड अनुपम गांधी यांच्या नेतृत्वाखाली महाविद्यालय सातत्याने शैक्षणिक गुणवत्ता, संस्कारमूल्ये आणि विद्यार्थीकेंद्री उपक्रमांच्या माध्यमातून विद्यार्थ्यांच्या सर्वांगीण विकासासाठी कार्यरत आहे.
या आगळ्यावेगळ्या प्रवेशोत्सवामुळे नवागत विद्यार्थ्यांमध्ये उत्साहाचे वातावरण निर्माण झाले असून ‘वी आर टीम दिशा’ ही भावना अधिक दृढ झाल्याचे चित्र पाहायला मिळाले.
-----------------------
---------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
