कर्मवीर अण्णांच्या विचारांचा वारसा जपत, शाळेच्या सर्वांगीण प्रगतीसाठी पूर्ण निष्ठेने काम करणार - लतेश शिंदे
शिवशाही वृत्तसेवा, माळशिरस (प्रतिनिधी वैभव कुलकर्णी)
रयत शिक्षण संस्था, सातारा संचलित 'हनुमान विद्यालय, शिंदेवाडी' येथील शालेय समितीवर (स्कूल कमिटी) सदस्य म्हणून श्री. लतेश लक्ष्मण शिंदे यांची निवड करण्यात आली आहे. रयत शिक्षण संस्थेच्या केंद्रीय कार्यालयाकडून अधिकृत आदेश प्राप्त होताच या निवडीवर शिक्कामोर्तब झाले असून, शैक्षणिक क्षेत्रात त्यांच्या निवडीचे स्वागत होत आहे.
रयत शिक्षण संस्थेच्या शिस्तबद्ध कार्यपद्धतीचा भाग म्हणून शाळेच्या विकासासाठी आणि प्रशासकीय बाबींमध्ये निर्णय घेण्यासाठी शालेय समिती महत्त्वाची असते. लतेश शिंदे यांच्या सामाजिक कामाची व्याप्ती आणि त्यांचा शैक्षणिक क्षेत्रातील सखोल अनुभव लक्षात घेता, संस्थेने त्यांच्यावर विश्वास दाखवून ही महत्त्वपूर्ण जबाबदारी सोपवली आहे.
शैक्षणिक प्रगतीसाठी कटिबद्ध
आपल्या निवडीबद्दल बोलताना श्री. लतेश शिंदे म्हणाले की, "रयत शिक्षण संस्थेसारख्या ध्येयवादी संस्थेच्या माध्यमातून शालेय समिती सदस्य म्हणून काम करण्याची संधी मिळणे ही माझ्यासाठी अत्यंत भाग्याची गोष्ट आहे. कर्मवीर अण्णांच्या विचारांचा वारसा जपत, शाळेच्या सर्वांगीण प्रगतीसाठी आणि विद्यार्थ्यांच्या उज्वल भविष्यासाठी मी पूर्ण निष्ठेने कार्यरत राहीन."
श्री. शिंदे यांच्या या निवडीबद्दल रयत शिक्षण संस्थेचे वरिष्ठ पदाधिकारी, स्थानिक गावकरी, पालक आणि मित्रपरिवाराकडून त्यांचे अभिनंदन होत आहे. रयत शिक्षण संस्थेची उज्ज्वल परंपरा ते आपल्या कार्यातून अधिक समर्थपणे पुढे नेतील आणि शाळेच्या प्रगतीत मोलाचे योगदान देतील, असा विश्वास व्यक्त केला जात आहे.
-----------------------
---------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
