३० एप्रिलला वाईत पदनियुक्तीसाठी मुलाखती - योगेश फाळके
शिवशाही वृत्तसेवा, वाई (प्रतिनिधी शुभम कोदे)
सातारा जिल्ह्यातील औद्योगिक क्षेत्रात स्थानिक कामगारांना न्याय मिळवून देण्यासाठी आणि संघटनेची पाळेमुळे अधिक घट्ट करण्यासाठी शिवसेना-शिव कामगार सेना आता सज्ज झाली आहे. सातारा जिल्हा शिव कामगार सेनेच्या वतीने आगामी ३० एप्रिल २०२६ रोजी दुपारी १ वाजता वाई येथील सर्किट हाऊस येथे विविध रिक्त पदांसाठी जाहीर मुलाखतींचे आयोजन करण्यात आले आहे, अशी माहिती योगेश फाळके यांनी दिली.
कामगारांच्या प्रश्नांवर ठोस भूमिकेचा निर्धार
सातारा जिल्ह्यातील एमआयडीसी (MIDC) परिसरात स्थानिक कामगारांची होणारी गळचेपी आणि वाढती बेरोजगारी यावर भाष्य करताना योगेश फाळके म्हणाले की, "जिल्ह्यातील औद्योगिक क्षेत्रात स्थानिक भूमिपुत्रांना डावलून परप्रांतीय कामगारांना दिले जाणारे प्राधान्य ही चिंतेची बाब आहे. याशिवाय सुरक्षिततेचा अभाव, यंत्रसामग्रीमुळे होणारे अपघात, वेतन कपात आणि कामगार कायद्यांचे होणारे उल्लंघन यांविरुद्ध आता शिव कामगार सेना आक्रमक पवित्रा घेणार आहे."
संघटन विस्ताराची मोठी संधी
शिवसेना ही केवळ निवडणूक लढवणारी संघटना नसून ती ८० टक्के समाजकारण आणि २० टक्के राजकारण या तत्त्वावर चालणारी ताकद आहे. कामगार क्षेत्रात प्रत्येक उद्योगात कामगारांचा आवाज बुलंद करण्यासाठी आणि त्यांच्या हक्कांचा लढा कायदेशीर व संघटनात्मक पातळीवर लढण्यासाठी जिल्ह्याचा विस्तार करण्यात येत आहे.
मुलाखतीचा तपशील खालीलप्रमाणे:
• तारीख: ३० एप्रिल २०२६
• वेळ: दुपारी १:०० वाजता
• स्थळ: सर्किट हाऊस, वाई.
जिल्ह्यातील शिवसैनिकांना साद
जिल्ह्यातील जे शिवसैनिक, कामगार नेते आणि संघटनात्मक कौशल्य असलेले कार्यकर्ते कामगारांच्या हितासाठी काम करण्यास इच्छुक आहेत, त्यांनी या मुलाखतीस मोठ्या संख्येने उपस्थित राहावे. "ही केवळ पदनियुक्ती नसून, अन्यायाविरुद्ध लढण्याची एक संधी आहे," असे आवाहनही फाळके यांनी यावेळी केले.
"कामगारांचा हक्क – आमची जबाबदारी!" हे ब्रीद घेऊन शिव कामगार सेना प्रत्येक कारखान्यात आणि कंपनीत कामगारांच्या पाठीशी खंबीरपणे उभी राहणार असल्याचा विश्वास यावेळी व्यक्त करण्यात आला.
-----------------------
---------------------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
