आरोपीने यापूर्वी चुलत्याचाही केला होता खून - वाई पोलिसांकडून आरोपीला तातडीने अटक
शिवशाही वृत्तसेवा, वाई (प्रतिनिधी शुभम कोदे)
सातारा जिल्ह्यातील वाई तालुक्यातील नागेवाडी येथे एका धक्कादायक घटनेने संपूर्ण परिसर हादरून गेला आहे. घरगुती वादातून संतापलेल्या एका दिराने आपल्या सख्ख्या भावजयीची हत्या केल्याची घटना उघडकीस आली आहे. या घटनेमुळे नागेवाडी परिसरात प्रचंड खळबळ उडाली असून भीतीचे सावट पसरले आहे.
मिळालेल्या प्राथमिक माहितीनुसार, नागेवाडी येथील यादव कुटुंबात गेल्या काही दिवसांपासून सातत्याने घरगुती कारणावरून वाद सुरू होते. आज या वादाने उग्र रूप धारण केले. आरोपी भिकू विठ्ठल यादव याचा आपली भावजय गीताबाई चंद्रकांत यादव (वय ४२) यांच्याशी वाद झाला. या वादाच्या भरात संतापलेल्या भिकूने गीताबाईंवर जीवघेणा हल्ला केला. हा हल्ला इतका भीषण होता की, गंभीर जखमांमुळे गीताबाई यांचा जागीच मृत्यू झाला.
गुन्हेगारी पार्श्वभूमी आणि जुना वाद
विशेष म्हणजे, आरोपी भिकू विठ्ठल यादव याची गुन्हेगारी पार्श्वभूमी असल्याचे समोर येत आहे. यापूर्वी देखील जमिनीच्या वादातून त्याने आपल्या चुलत्याचा खून केल्याचा आरोप आहे. आता पुन्हा एकदा कौटुंबिक वादातून त्याने भावजयीचा जीव घेतल्याने परिसरात संताप व्यक्त केला जात आहे.
पोलिसांची तत्परता: आरोपी अटकेत
घटनेची माहिती मिळताच वाई पोलीस ठाण्याचे डीबी विभाग प्रमुख पोलीस उपनिरीक्षक सुधीर वाळुंज यांनी तातडीने वरिष्ठ अधिकारी डीवायएसपी सुनील साळुंखे व पोलीस निरीक्षक जितेंद्र शहाणे यांना घटनेची कल्पना दिली. पोलिसांनी तात्काळ घटनास्थळी धाव घेत तपास सुरू केला. यावेळी गुन्ह्याच्या ठिकाणाहून पळून जाण्याच्या तयारीत असलेल्या आरोपी भिकूला पोलिसांनी शिताफीने ताब्यात घेतले.
तपास सुरू
पोलिसांनी मृतदेहाचा पंचनामा करून तो शवविच्छेदनासाठी पाठवला आहे. या हत्येमागील नेमके कारण काय होते आणि वादाचे मूळ स्वरूप काय होते, याचा अधिक तपास वाई पोलीस करत आहेत. आरोपीवर खुनाचा गुन्हा दाखल करण्याची प्रक्रिया पोलीस ठाण्यात सुरू आहे. भरदिवसा घडलेल्या या थरारामुळे नागेवाडी गावावर शोककळा पसरली असून पोलिसांनी गावात शांतता राखण्याचे आवाहन केले आहे.
-----------------------
---------------------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
