गडचिरोलीतील ऐतिहासिक कामगिरीबद्दल मिळाले विशेष पदक
शिवशाही वृत्तसेवा, वैजापूर (प्रतिनिधी अनिल सूर्यवंशी)
कर्तव्याप्रती निष्ठा आणि अजोड धाडसाच्या जोरावर गडचिरोलीतील घनदाट जंगलात २७ नक्षलवाद्यांना कंठस्नान घालणारे सहायक पोलीस निरीक्षक (API) वैभव रणखांब यांचा शिऊर (ता. वैजापूर) येथे स्थानिक नागरिकांच्या वतीने भव्य सत्कार करण्यात आला. रणखांब यांच्या या ऐतिहासिक कामगिरीची दखल घेत नुकताच त्यांना मुंबई येथे सन्मानित करण्यात आले होते, त्यानंतर स्थानिक स्तरावर त्यांचा हा गौरव करण्यात आला.
एकाच मोहिमेत २७ नक्षलवाद्यांचा खात्मा
वैभव रणखांब यांनी २०२१ मध्ये गडचिरोली जिल्ह्यात नक्षलविरोधी मोहिमेचे 'सी-६०' (C-60) पथकाचे इन्चार्ज म्हणून नेतृत्व केले होते. एका गुप्त माहितीच्या आधारे त्यांनी आपल्या सहकाऱ्यांसह नक्षलवाद्यांच्या तळावर धडक कारवाई केली. अत्यंत प्रतिकूल परिस्थितीत प्राणांची बाजी लावून त्यांनी एकाच दिवसात २७ नक्षलवाद्यांचा खात्मा केला होता. या धडाकेबाज कामगिरीमुळे नक्षलवाद्यांचे कंबरडे मोडले असून, संपूर्ण महाराष्ट्र पोलीस दलाची मान उंचावली गेली आहे.
मुंबईत 'विशेष गडचिरोली ऑपरेशन पदक' प्रदान
या उल्लेखनीय शौर्याबद्दल वैभव रणखांब यांना नुकतेच मुंबईतील दहशतवादी विरोधी पथक (ATS) कार्यालयात आयोजित विशेष कार्यक्रमात सन्मानित करण्यात आले. अतिरिक्त पोलीस महासंचालक श्री. नवल बजाज यांच्या हस्ते त्यांना 'विशेष गडचिरोली ऑपरेशन पदक' प्रदान करण्यात आले. सध्या ते वैजापूर तालुक्यातील शिऊर पोलीस ठाण्यात कार्यरत असून, त्यांच्या या यशाचे वृत्त समजताच संपूर्ण तालुक्यातून त्यांच्यावर कौतुकाचा वर्षाव होत आहे.
स्थानिक नागरिकांकडून कृतज्ञता सोहळा
शिऊर पोलीस स्टेशनच्या हद्दीतील जागरूक नागरिकांनी रणखांब यांच्या कर्तृत्वाचा अभिमान व्यक्त करण्यासाठी एका विशेष कार्यक्रमाचे आयोजन केले होते. यावेळी प्रकाश बापू ठुबे पाटील, अवधूत आबा ठुबे, माजी सरपंच नारायण पवार, सोमनाथ पैठण पगारे, प्रभाकर जाधव, सरपंच काकासाहेब गायकवाड, यांच्यासह ग्रामस्थांनी वैभव रणखांब यांचा शाल आणि श्रीफळ देऊन यथोचित सत्कार केला. "देशाच्या सुरक्षेसाठी आपले आयुष्य पणाला लावणाऱ्या अशा अधिकाऱ्याचा सत्कार करणे हे आमचे भाग्य आहे," अशा भावना यावेळी उपस्थितांनी व्यक्त केल्या.
रणखांब यांनी आपल्या सत्काराला उत्तर देताना सर्वांचे आभार मानले आणि खाकी वर्दीची शान राखत जनतेच्या सेवेसाठी सदैव तत्पर राहण्याची ग्वाही दिली. त्यांच्या या गौरवशाली वाटचालीसाठी पंचक्रोशीतील नागरिकांनी त्यांना पुढील कारकिर्दीसाठी भरभरून शुभेच्छा दिल्या आहेत.
-----------------------
---------------------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
