महायुतीच्या जागावाटपाचा पेच मात्र अद्यापही कायम!
शिवशाही वृत्तसेवा, सातारा (शुभम कोदे)
सातारा जिल्हा मध्यवर्ती सहकारी बँकेच्या निवडणुकीत सोमवारी (दि. १९ ऑक्टोबर) महत्त्वाची राजकीय घडामोड घडली. विधान परिषदेचे माजी सभापती श्रीमंत रामराजे नाईक-निंबाळकर यांनी फलटण विकास सहकारी संस्था मतदारसंघ आणि कृषी प्रक्रिया मतदारसंघातून दाखल केलेले आपले दोन्ही उमेदवारी अर्ज मागे घेतले. जिल्हा बँकेत सुमारे २५ वर्षे संचालक म्हणून काम केलेल्या रामराजेंच्या या निर्णयामुळे सहकार क्षेत्रासह जिल्ह्याच्या राजकीय वर्तुळात चर्चेला उधाण आले आहे. जिल्हा बँकेच्या निवडणुकीत सलग दहा वर्षे संचालक राहिलेल्या उमेदवारांच्या पात्रतेचा मुद्दा ऐरणीवर आला असतानाच रामराजेंनी माघार घेतल्याने या निर्णयामागील राजकीय गणितांविषयी तर्कवितर्क सुरू झाले आहेत.
सातारा जिल्हा बँकेच्या राजकारणात रामराजे नाईक-निंबाळकर यांचा दीर्घकाळ प्रभाव राहिला आहे. सुमारे पंचवीस वर्षांच्या संचालकपदाच्या कारकिर्दीमुळे त्यांचा निर्णय महत्त्वाचा मानला जात आहे. दोन वेगवेगळ्या मतदारसंघांतून दाखल केलेले अर्ज मागे घेतल्याने निवडणुकीतील त्यांची थेट उमेदवारी आता संपुष्टात आली आहे. दरम्यान, बँकेच्या निवडणुकीत दहा वर्षांच्या संचालकपदाच्या निकषावरून निर्माण झालेल्या कायदेशीर पेचामुळे अनेक मातब्बर नेत्यांना सावध भूमिका घ्यावी लागत आहे. अनिल देसाई आणि राजेंद्र राजपुरे यांच्याशी संबंधित न्यायालयीन घडामोडींनंतर या विषयाची चर्चा अधिक तीव्र झाली आहे. अशा पार्श्वभूमीवर रामराजेंच्या माघारीकडे केवळ वैयक्तिक निर्णय म्हणून नव्हे, तर जिल्हा बँकेतील बदलत्या राजकीय समीकरणांच्या संदर्भातही पाहिले जात आहे.
जिल्हा बँकेची निवडणूक महायुतीने एकत्र लढविण्याच्या हालचाली सुरू असल्या, तरी जागावाटपाचा प्रश्न अद्याप पूर्णपणे सुटलेला नाही. सार्वजनिक बांधकाममंत्री शिवेंद्रसिंहराजे भोसले आणि मदत व पुनर्वसन मंत्री मकरंद पाटील यांच्यासह महायुतीतील प्रमुख नेत्यांच्या बैठकांना वेग आला आहे. भाजप, राष्ट्रवादी काँग्रेस आणि शिवसेना यांच्यात किती जागा वाट्याला येणार, कोणत्या मतदारसंघात कोणाला संधी मिळणार आणि संभाव्य बिनविरोध निवडीसाठी कोणत्या स्तरावर तडजोड होणार, याबाबत उत्सुकता आहे. ठरावांची संख्या, स्थानिक राजकीय प्रभाव आणि उमेदवारांची पात्रता या मुद्द्यांचा जागावाटपावर परिणाम होण्याची शक्यता आहे.
रामराजे निबाळकर यांच्या माघारीमुळे फलटण सोसायटी मतदार संघ आणि कृषी प्रक्रिया मतदारसंघांतील निवडणूक समीकरणे बदलण्याची शक्यता असून, त्याचा महायुतीच्या चर्चेवर काय परिणाम होतो, हे पाहणे महत्त्वाचे ठरणार आहे. निवडणूक कार्यक्रमानुसार उमेदवारी अर्ज मागे घेण्याची अंतिम मुदत बुधवार, दि. २१ ऑक्टोबर २०२६ रोजी सकाळी ११ ते दुपारी ३ वाजेपर्यंत आहे. त्यामुळे पुढील दोन दिवसांत आणखी कोणते उमेदवार माघार घेतात, कोणत्या मतदारसंघांत बिनविरोध निवडीचा मार्ग मोकळा होतो आणि महायुती जागावाटपाचा अंतिम फॉर्म्युला कसा ठरवते, याकडे जिल्ह्याचे लक्ष लागले आहे. रामराजे नाईक-निंबाळकर यांची माघार ही जिल्हा बँकेच्या निवडणुकीतील महत्त्वाची घडामोड ठरली आहे. मात्र, या निर्णयामुळे महायुतीतील जागावाटपाचा पेच सुटणार की नव्या राजकीय चर्चांना सुरुवात होणार, याचे उत्तर आगामी बैठकांनंतरच स्पष्ट होईल.
-----------------
----------------
----------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
