अकलूज उपविभागात महात्मा जोतिराव फुले महसूल लोक अदालत

पक्षकारांनी तडजोडीने प्रलंबित दावे निकाली काढण्याचे उपविभागीय अधिकारी विजया पांगारकर यांचे आवाहन

Mahatma phule mahasul lokadalat, Vijaya pangarkar, akaluj, malshiras, Solapur, shivshahi news,

शिवशाही वृत्तसेवा, सोलापूर (वैभव कुलकर्णी)

अकलूज - जमिनींशी संबंधित महसुली दाव्यांमुळे पक्षकारांचा वाया जाणारा वेळ आणि पैसा वाचवण्यासाठी शासनस्तरावर विशेष पुढाकार घेण्यात आला आहे. क्रांतिसूर्य महात्मा जोतिराव फुले यांच्या द्विशताब्दी जयंती वर्षाचे औचित्य साधून महसूल व वन विभागामार्फत १ सप्टेंबर २०२६ ते ३१ मार्च २०२७ दरम्यान ‘महात्मा जोतिराव फुले महसूल लोक अदालत अभियान’ राबवले जात आहे.

या अभियानांतर्गत उपविभागीय अधिकारी कार्यालय, माळशिरस विभाग (अकलूज) यांच्या अर्धन्यायिक न्यायालयातील प्रलंबित प्रकरणांच्या जलद व आपापसातील सहमतीने निकालासाठी २८ ऑक्टोबर २०२६ आणि १६ डिसेंबर २०२६ या दोन तारखा निश्चित करण्यात आल्या आहेत. सोलापूरचे अपर जिल्हाधिकारी यांच्या मार्गदर्शक कार्यक्रमानुसार या लोक अदालतीचे आयोजन करण्यात आले आहे.

ठळक बाबी व प्रक्रिया:

प्रपत्र - ‘अ’ दाखल करणे अनिवार्य:

ज्या प्रकरणांमध्ये दोन्ही पक्षकार आपापसांत तडजोड करण्यास तयार आहेत, त्यांनी स्वतः किंवा आपल्या वकिलामार्फत ‘प्रपत्र - अ’ (तडजोडनामा अर्ज) उपविभागीय अधिकारी कार्यालयात दाखल करणे आवश्यक आहे.

वेळ व पैशांची बचत:

महसूल न्यायालयात वर्षानुवर्षे प्रलंबित असलेल्या दाव्यांचा परस्पर संमतीने तात्काळ निपटारा होऊन न्यायालयीन फेऱ्यांतून कायमची सुटका मिळण्यास मदत होणार आहे.

सहभागाचे आवाहन:

माळशिरस विभागातील संबंधित पक्षकारांनी या सुवर्णसंधीचा लाभ घेत मोठ्या संख्येने लोक अदालतीत उपस्थित राहून सहकार्य करावे, असे आवाहन उपविभागीय अधिकारी विजया पांगारकर यांनी प्रसिद्धी पत्रकाद्वारे केले आहे.

-----------------