काळूबाई देवीच्या भक्तांसाठी दिशादर्शक फलकांची सुविधा

सागर मांढरे व मंगेश मांढरे यांचा पुढाकार

Direction board for mandhardev, police, wai, satara, shivshahi news,

शिवशाही वृत्तसेवा, वाई (प्रतिनिधी शुभम कोदे)

महाराष्ट्रातील प्रमुख देवस्थानांपैकी एक असलेल्या मांढरदेव येथील श्री काळूबाई देवीच्या दर्शनासाठी दरवर्षी मोठ्या संख्येने भाविक येतात. मात्र परिसरात पुरेसे दिशादर्शक फलक नसल्यामुळे भाविकांची अनेकदा गैरसोय होत असल्याची बाब वाई पोलिसांच्या निदर्शनास आली होती.

ही समस्या लक्षात घेऊन वाई पोलीस स्टेशनने मांढरदेव येथील युवा सामाजिक कार्यकर्ते व पोलीस मित्र सागर मांढरे (मांढरे सरकार उद्योग समूह) तसेच मंगेश मांढरे (गायत्री हॉटेल) यांच्याशी संपर्क साधला. भाविकांची गैरसोय दूर करण्यासाठी दोघांनीही तातडीने पुढाकार घेत दिशादर्शक फलक उपलब्ध करून देण्याचे मान्य केले. त्यानुसार दि. १४ ऑगस्ट २०२६ रोजी वाई पोलीस स्टेशन येथे सर्व दिशादर्शक फलक पोलिसांच्या स्वाधीन करण्यात आले. या उपक्रमामुळे मांढरदेव परिसरात येणाऱ्या भाविकांना विविध ठिकाणे व मार्ग शोधताना मोठी मदत होणार असून, वाहतूक व्यवस्थेलाही हातभार लागणार आहे.

यावेळी उपविभागीय पोलीस अधिकारी सुनील साळुंखे, पोलीस निरीक्षक प्रदीप सूर्यवंशी, मांढरदेव बीट अंमलदार उद्धव लेंभे, ट्रॅफिक पोलीस गोरख दाभाडे, रूपेश जाधव कोळेकर यांच्यासह पोलीस कर्मचारी उपस्थित होते. तसेच मांढरदेव येथील ऋषिकेश जाधव, काळुराम पार्टे, गणेश मांढरे, डॉ. जगताप आदींची उपस्थिती होती. भाविकांची गैरसोय दूर करण्यासाठी सामाजिक बांधिलकीतून पुढाकार घेतल्याबद्दल सागर मांढरे व मंगेश मांढरे यांचे कौतुक होत असून, “सेवेतून श्रद्धेला दिशा” देणारा हा उपक्रम ठरत आहे.

-----------------