भूवैकुंठ पांढरी नगरीत पार पडला दिमाखदार पुरस्कार वितरण सोहळा
शिवशाही वृत्तसेवा, छ संभाजीनगर (प्रतिनिधी मनोज चव्हाण)
परिमल सांस्कृतिक व्यासपीठ (रोपळे बु., ता. पंढरपूर) च्या वतीने आयोजित करण्यात आलेला अत्यंत उत्साहात आणि दिमाखदार राज्यस्तरीय साहित्य पुरस्कार वितरण सोहळ्यात छत्रपती संभाजीनगर येथील डॉ. अनंत कडेठाणकर यांना राज्यस्तरीय साहित्य पुरस्कार देऊन गौरविण्यात आले आहे
हॉटेल राधाकृष्ण कराड रोड, पंढरपूर येथे आयोजित या मंचावर प्रमुख पाहुणे म्हणून पुण्यश्लोक अहिल्यादेवी होळकर सोलापूर विद्यापीठाचे सहाय्यक कुलसचिव डॉ. शिवाजी शिंदे, मराठी साहित्य परिषद (पंढरपूर शाखा) चे अध्यक्ष सिद्धार्थ ढवळे, युवा नेते प्रणव परिचारक, तसेच आदर्श माता पुष्पलता निकम आणि परिमल सांस्कृतिक व्यासपीठाचे अध्यक्ष सचिन कुलकर्णी आदी मान्यवर उपस्थित होते.
संपूर्ण महाराष्ट्रातील विविध भागांतून आलेल्या ३१ गुणवंत साहित्यिकांना त्यांच्या उत्कृष्ट साहित्यकृतींसाठी वेगवेगळ्या श्रेणीत राज्यस्तरीय पुरस्कार देऊन गौरविण्यात आले. यामध्ये छत्रपती संभाजीनगर येथील डॉ. अनंत कडेठाणकर यांच्या लाईफ जॅकेट या कथासंग्रहाला 'कथा परिमल राज्यस्तरीय साहित्य पुरस्कार' प्रदान करण्यात आला. उपस्थित मान्यवरांच्या शुभहस्ते डॉ. अनंत कडेठाणकर यांना सन्मानपूर्वक पुरस्कार प्रदान करण्यात आला. मानाची शाल, पुस्तकांचा संच, गुलाबपुष्प, आणि सन्मानचिन्ह, असे पुरस्काराचे स्वरूप आहे.
कार्यक्रमाचे प्रास्ताविक व स्वागत करताना परिमलचे अध्यक्ष सचिन कुलकर्णी यांनी संस्थेच्या साहित्यिक व सांस्कृतिक प्रवासाचा आढावा घेतला. प्रमुख पाहुण्यांनी आपल्या भाषणात पुरस्कारप्राप्त साहित्यिकांच्या लेखनाचा गौरव करत, अशा पुरस्कारांमुळे दर्जेदार साहित्याला व नव्या लेखकांना मोठी प्रेरणा मिळते, असा विश्वास व्यक्त केला. रवि वसंत सोनार यांनी उपस्थितांचे आभार मानले. या सोहळ्याला महाराष्ट्राच्या कानाकोपऱ्यातून आलेले साहित्यिक, रसिक आणि साहित्यप्रेमी मोठ्या संख्येने उपस्थित होते.
-----------------------
---------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
