वाईजवळ धक्कादायक घटना - परिसरात हळहळ
शिवशाही वृत्तसेवा, वाई (प्रतिनिधी शुभम कोदे)
तालुक्यातील पसरणी येथील एका तरुण विद्यार्थिनीचा मृतदेह धोम डावा कालव्यामध्ये आढळल्याने वाई परिसर आणि पसरणी गावात मोठी खळबळ उडाली आहे. अस्मिता योगेश शिर्के (वय अंदाजे १९ वर्षे) असे या दुर्दैवी विद्यार्थिनीचे नाव असून, तिच्या निधनाने परिसरात तीव्र शोक व्यक्त केला जात आहे.
मोतीबाग परिसरात आढळली होती दुचाकी
मिळालेल्या माहितीनुसार, अस्मिता शिर्के ही सातारा येथील 'यशोदा टेक्निकल इन्स्टिट्यूट'मध्ये इंजिनिअरिंगच्या प्रथम वर्षात शिक्षण घेत होती. दरम्यान, तिची लाल रंगाची हिरो प्लेझर दुचाकी (क्रमांक: MH 11 BG 0388) मोतीबाग परिसरातील कॅनॉलजवळ संशयास्पद आणि पार्क केलेल्या अवस्थेत आढळून आली होती. दुचाकी बराच वेळ एकाच ठिकाणी उभी असल्याने स्थानिक पातळीवर संशय बळावला आणि त्या दिशेने शोधमोहीम सुरू करण्यात आली.
शेंदुरजणे हद्दीत सापडला मृतदेह
मोतीबाग कालव्याच्या परिसरापासून शोध घेत असताना, अखेर शेंदुरजणे गावच्या हद्दीतील कॅनॉलच्या पाण्यात अस्मिताचा मृतदेह तरंगताना आढळून आला. या घटनेची माहिती मिळताच स्थानिक नागरिकांनी आणि पोलिसांनी तातडीने घटनास्थळी धाव घेतली. मृतदेह पाण्यातून बाहेर काढून पुढील कार्यवाहीसाठी रुग्णालयात पाठवण्यात आला.
मृत्यूचे कारण अस्पष्ट; पोलिसांचा तपास सुरू
अस्मिताचा मृत्यू नेमका कसा झाला, ती चुकून कॅनॉलमध्ये पडली की यामागे अन्य काही कारण आहे, याबाबत अद्याप कोणतीही निश्चित माहिती समोर आलेली नाही. प्राथमिक तपासानंतर मृतदेहाचे शवविच्छेदन (Post-Mortem) करून तो अंत्यसंस्कारासाठी नातेवाईकांच्या ताब्यात देण्यात आला आहे. वाई पोलीस या प्रकरणाचा अधिक तपास करत असून, शवविच्छेदन अहवालानंतरच मृत्यूचे नेमके कारण स्पष्ट होईल, असे पोलिसांकडून सांगण्यात आले.
पसरणी गावावर शोककळा
अस्मिताचे वडील योगेश शिर्के हे दुबई येथे नोकरीनिमित्त वास्तव्यास असून, आपल्या लाडक्या लेकीच्या अशा अचानक आणि दुर्दैवी जाण्याने शिर्के कुटुंबावर दुःखाचा डोंगर कोसळला आहे. एका होतकरू आणि तरुण विद्यार्थिनीचा असा करुण अंत झाल्याचे समजताच पसरणी गावावर शोककळा पसरली असून सर्वत्र हळहळ व्यक्त होत आहे.
-----------------------
---------------------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
