कै. पारूबाई शितोळे यांना अनोखी श्रद्धांजली
शिवशाही वृत्तसेवा, शिरूर (प्रतिनिधी फैजल पठाण)
परंपरेनुसार होणाऱ्या दशक्रिया विधीच्या अवाजवी खर्चाला फाटा देऊन, समाजासाठी काहीतरी देणं लागतं या भावनेतून सोरतापवाडी (ता. हवेली) येथील शितोळे कुटुंबाने एक आदर्श पायंडा घालून दिला आहे. गावच्या आदर्श आजी कै. पारूबाई सोपानराव शितोळे यांच्या दशक्रिया विधी निमित्त त्यांच्या २४ नातवंडांनी एकत्र येत जिल्हा परिषद प्राथमिक शाळेतील गरजू मुलांना शालेय साहित्याचे वाटप केले.
सोरतापवाडी गावचे माजी उपसरपंच शंकर बापू कड देशमुख यांच्या मार्गदर्शनाखाली हा स्तुत्य उपक्रम राबवण्यात आला. कै. पारूबाई शितोळे यांच्या पश्चात त्यांचे मोठे कुटुंब असून, त्यांच्या १० नातवांनी आणि १४ नातींनी आपल्या आजीच्या स्मृती प्रित्यर्थ शाळेतील मुलांच्या शैक्षणिक प्रगतीसाठी हातभार लावण्याचे ठरवले. या उपक्रमांतर्गत जिल्हा परिषद प्राथमिक शाळा, सोरतापवाडी येथील विद्यार्थ्यांना वह्या, पेन आणि इतर आवश्यक शैक्षणिक साहित्याचे वाटप करण्यात आले.
आदर्श जीवनप्रवास आणि वारसा
कै. पारूबाई शितोळे या अत्यंत प्रेमळ आणि कर्तबगार महिला होत्या. त्यांच्या संस्कारांची शिदोरी त्यांच्या मुलांनी आणि नातवंडांनी समर्थपणे जपली आहे. त्या गव्हर्नमेंट कॉन्ट्रॅक्टर संजय शितोळे यांच्या मातोश्री, माजी उपसरपंच शंकर बापू कड देशमुख यांच्या आत्या, तर शिरूर तालुका राष्ट्रवादी काँग्रेसचे उपाध्यक्ष डॉ. सुजित शेलार यांच्या आजी होत्या.
याप्रसंगी बोलताना शंकर बापू कड देशमुख म्हणाले की, "आजीचे विचार आणि प्रेम सदैव आमच्या पाठीशी राहील. केवळ विधी पूर्ण करण्यापेक्षा समाजोपयोगी कार्य करून आजीच्या स्मृती जपणे, हाच आमचा मूळ उद्देश होता."
कुटुंबियांचा पुढाकार
या कार्यासाठी कै. पारूबाई यांची मुले चिंतामणी सोपानराव शितोळे, मच्छिंद्र सोपानराव शितोळे, संजय सोपानराव शितोळे, बबन सोपानराव शितोळे तसेच त्यांच्या कन्या शोभा नारायण शेलार, छबाबाई संभाजी वाबळे आणि मंगल चंद्रकांत जगताप यांनी विशेष पुढाकार घेतला.
कार्यक्रमाच्या शेवटी शाळेच्या मुख्याध्यापिकांनी शितोळे कुटुंबाच्या या संवेदनशील निर्णयाचे कौतुक केले व आभार मानले. उपस्थितांनी कै. पारूबाई शितोळे यांना भावपूर्ण श्रद्धांजली अर्पण केली. शितोळे कुटुंबाने राबविलेल्या या 'अनोख्या' उपक्रमाचे संपूर्ण परिसरातून कौतुक होत आहे.
-----------------------
---------------------
----------------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
