समृद्धी महामार्गावरील लोखंडी अँगल आणि सुरक्षा जाळीची चोरी

चंदनझिरा पोलिसांकडून दोन आरोपींना बेड्या

Theft on Samruddhi Highway, sindkhedraja, police, buldhana, shivshahi news,

शिवशाही वृत्तसेवा, सिंदखेड राजा (प्रतिनिधी आरिफ शेख)
५.५३ लाखांचा मुद्देमाल जप्त

समृद्धी महामार्गावर वन्यप्राणी आणि जनावरांच्या प्रवेशामुळे होणारे अपघात रोखण्यासाठी बसवण्यात आलेले लोखंडी अँगल आणि सुरक्षा जाळ्यांची चोरी करणाऱ्या टोळीचा चंदनझिरा पोलिसांनी पर्दाफाश केला आहे. या कारवाईत पोलिसांनी दोन आरोपींना अटक केली असून, ५ लाख ५३ हजार रुपये किमतीचा मुद्देमाल जप्त केला आहे.

थरारक पाठलाग करून आवळल्या मुसक्या

मिळालेल्या माहितीनुसार, २८ फेब्रुवारी २०२६ रोजी मध्यरात्री १२:३० वाजेच्या सुमारास चंदनझिरा पोलीस ठाण्याचे गस्ती पथक नागेवाडी टोल नाका परिसरात पेट्रोलिंग करत होते. दरम्यान, औरंगाबादच्या दिशेने भरधाव वेगाने जाणारे एक पीकअप वाहन (क्र. MH-20-GC-0415) पोलिसांना दिसले. पोलिसांची गाडी पाहताच चालकाने वाहन पळवण्याचा प्रयत्न केला. संशय आल्याने पोलिसांनी तत्काळ पाठलाग सुरू केला. पोलिसांना मागे पाहून चालकाने वाहन रस्त्याच्या कडेला उभे केले आणि अंधाराचा फायदा घेऊन वाहनातील तिघांनी पळून जाण्याचा प्रयत्न केला. मात्र, पोलिसांनी शिताफीने पाठलाग करून इकरार खान मुक्तारखान आणि विलास भाऊलाल दुडियार (दोघे रा. दुसरबीड, ता. सिंदखेड राजा) या दोघांना पकडले. या कारवाईदरम्यान वाहन मालक तथा चालक देवानंद शंकर डोईफोडे (रा. केशव शिवणी) हा पळून जाण्यात यशस्वी झाला.

एक टन लोखंड आणि कटर जप्त

पोलिसांनी पीकअप वाहनाची झडती घेतली असता, त्यात सुमारे एक टन वजनाचे समृद्धी महामार्गावरून चोरलेले लोखंडी अँगल आणि सुरक्षा जाळी आढळून आली. तसेच लोखंड कापण्यासाठी वापरण्यात येणारे तीन मोठे कात्री कटर (Bolt Cutters) जप्त करण्यात आले आहेत.

पीकअपसह भंगार दुकानदारावरही कारवाई

आरोपी हे चोरीचे साहित्य जालना येथील भंगार दुकानात विकण्यासाठी घेऊन जात होते. या प्रकरणी चोरीचा माल खरेदी करणाऱ्या भंगार दुकानदारालाही पोलिसांनी ताब्यात घेतले आहे.

गुन्हा दाखल

या प्रकरणी पोलीस हेड कॉन्स्टेबल कृष्णा तंगे यांच्या फिर्यादीवरून चंदनझिरा पोलीस ठाण्यात विविध कलमान्वये गुन्हा दाखल करण्यात आला आहे. फरार आरोपी देवानंद डोईफोडे याचा पोलीस शोध घेत असून, या टोळीने महामार्गावर आणखी कुठे चोरी केली आहे का, याचा तपास सुरू आहे.