रात्रभर युद्धपातळीवर बचावकार्य - सातारा जिल्ह्यासह चिपळूणवर शोककळा

8 killed in a road accident, ambenali Ghat, poladpur, mahabaleshwar, satara, shivshahi news,

शिवशाही वृत्तसेवा, सातारा (प्रतिनिधी शुभम कोदे)

महाबळेश्वर–पोलादपूर मार्गावरील धोकादायक आंबेनळी घाटात एक अत्यंत भीषण आणि हृदयद्रावक अपघात घडला आहे. कुंभरोशी परिसरापासून सुमारे तीन किलोमीटर अंतरावर, पोलादपूर हद्दीत एक स्कॉर्पिओ गाडी तब्बल ७०० ते ८०० फूट खोल दरीत कोसळली. या कारमधील सर्वच्या सर्व आठ प्रवाशांचा जागीच दुर्दैवी मृत्यू झाल्याची भीती प्रशासनाने व्यक्त केली आहे. शनिवार आणि रविवारच्या दरम्यान रात्रीच्या वेळी हा अपघात घडला असावा, असा अंदाज आहे.

मोबाईल लोकेशनमुळे लागला शोध

मिळालेल्या माहितीनुसार, वाहनातील प्रवाशांशी संपर्क तुटल्यामुळे चिंतेत पडलेल्या नातेवाईकांनी पोलादपूर पोलीस ठाण्यात धाव घेतली होती. पोलिसांनी तात्काळ तांत्रिक यंत्रणा आणि मोबाईल लोकेशनचा आधार घेत शोध सुरू केला. लोकेशन माग काढत असतानाच आंबेनळी घाटाच्या खोल दरीत वाहन कोसळल्याचे निष्पन्न झाले.

अंधार आणि निसरड्या दरीत रात्रभर रेस्क्यू ऑपरेशन

घटनेची माहिती मिळताच पोलादपूर पोलीस, महसूल विभाग आणि स्थानिक स्वयंसेवी संस्थांच्या बचाव पथकांनी रात्रीच घटनास्थळाकडे धाव घेतली. दरीची अथांग खोली, घनदाट जंगल, रात्रीचा थरारक अंधार आणि निसरडा उतार अशा अत्यंत आव्हानात्मक परिस्थितीत 'प्रतापगड सर्च अँड रेस्क्यू टीम', 'महाबळेश्वर ट्रेकर्स', 'सह्याद्री ट्रेकर्स' आणि महाडच्या 'सिस्केप रेस्क्यू टीम'च्या जवानांनी दोराच्या सहाय्याने दरीत प्रवेश केला. शनिवार रात्री ८ वाजल्यापासून सुरू झालेले हे जीवघेणे बचावकार्य रात्रभर अखंड सुरू होते. अनेक तासांच्या प्रयत्नांनंतर रविवारी एका प्रवाशाचा मृतदेह बाहेर काढण्यात यश आले असून तो शवविच्छेदनासाठी पोलादपूर येथे पाठवण्यात आला आहे.

मृत्यू पावलेल्या प्रवाशांची प्राथमिक नावे:
अपघातग्रस्त प्रवासी हे सातारा आणि रत्नागिरी जिल्ह्यातील रहिवासी होते. प्रशासनाकडून अद्याप अधिकृत शिक्कामोर्तब झाले नसले, तरी प्राथमिक माहितीनुसार गाडीत खालील व्यक्ती प्रवास करत होत्या:

रितेश राजेंद्र लोखंडे २२ आसगाव (सातारा)
सुहास जितेंद्र लोखंडे २० आसगाव (सातारा)

महेश अनिल पवार २५ आसगाव (सातारा)
आदित्य अशोक साळुंखे २१ आसगाव (सातारा)

करण आनंद शिंगटे २१ मर्ढे (सातारा)
निखिल अभिमन्यू शिंगटे २५ मर्ढे (सातारा)

संदीप अशोक काटकर (चालक) ३७ खटाव (सातारा)
अंश समीर चव्हाण १९ बोरगाव, चिपळूण (रत्नागिरी)

वरिष्ठ अधिकाऱ्यांकडून पाहणी

घटनेचे गांभीर्य ओळखून उपविभागीय पोलीस अधिकारी (DYSP) शंकर काळे, पोलादपूरचे तहसीलदार कपिल घोरपडे आणि सहाय्यक पोलीस निरीक्षक आनंद रावडे यांनी तातडीने घटनास्थळाला भेट देऊन परिस्थितीचा आढावा घेतला. तसेच बचावकार्याला गती देण्यासाठी सर्व यंत्रणांना आवश्यक त्या सूचना दिल्या.

प्रशासकीय भूमिका

"घाटातील तीव्र वळणे, रात्रीचा अंधार, वाहनाचा वेग की चालकाचे नियंत्रण सुटल्याने हा अपघात झाला, याचा तपास पोलीस करत आहेत. संपूर्ण बचावकार्य पूर्ण झाल्यानंतर आणि अधिकृत पंचनाम्यानंतरच मृतांचा अंतिम आकडा आणि अपघाताचे नेमके कारण स्पष्ट केले जाईल."
- स्थानिक प्रशासन, पोलादपूर

या भीषण दुर्घटनेमुळे महाबळेश्वर, वाई, सातारा, खटाव आणि चिपळूण परिसरात तीव्र दुःख व्यक्त होत असून, संपूर्ण सातारा जिल्हा या घटनेने सुन्न झाला आहे. सध्या दरीच्या दुर्गम भागात विशेष तांत्रिक उपकरणे आणि क्रेनच्या मदतीने उर्वरित सात जणांचा शोध घेण्याचे काम युद्धपातळीवर सुरू आहे.

-----------------------