प्रियकरा सोबत लग्न करून सुखी संसार करण्यासाठी रचला स्वतःच्याच खुनाचा बनाव

प्रेमी युगुलाने नियोजनबद्ध रचलेला खूनाचा कट पोलिसांनी अवघ्या काही तासातच उलगडला

mangalwedha murder mystery, solapur, maharashtra, police, shivshahi news,

शिवशाही वृत्तसेवा, मंगळवेढा (प्रतिनिधी राज सारवडे)

मंगळवेढा तालुक्यातील पाठकळ येथे एका विवाहितेचा जळीत मृतदेह आढळला. परंतु संबंधित महिला जिवंत असल्याचे समोर आल्याने घटनेला वेगळेच वळण प्राप्त झाले आहे. या विवाहितेने प्रेमासाठी प्रियकराच्या मदतीने दुसऱ्याच महिलेची हत्या करून स्वतःच्या आत्महत्येचा बनाव रचल्याचे समोर आल्याने सगळीकडे खळबळ उडाली आहे.

अगदी सस्पेन्स चित्रपटाला शोभेल आता कट या प्रेमी युगलाने रचना होता मात्र अवघ्या काही तासात पोलिसांनी सत्य उजेडात आणले. आता जाळलेली महिला कोण याचा पोलिस शोध घेत असून विवाहिता आणि तिचा प्रियकर अटकेत आहेत. पोलीस अधीक्षक अतुल कुलकर्णी, उपविभागीय पोलीस अधिकारी विक्रांत गायकवाड, पोलीस निरीक्षक दत्तात्रय बोरीगिड्डे यांच्या मार्गदर्शनाखाली पोलीस उपनिरीक्षक नागेश बनकर, सहाय्यक पोलीस निरीक्षक अंकुश वाघमोडे, PSI विजय पिसे तसेच सर्व पोलीस कर्मचाऱ्यांनी धडाकेबाज कामगिरी करून नियोजनबद्ध केलेला खुनाचा आणि आत्महत्या दाखवण्याचा कट काही तासातच आरोपींवरच उलटवला आहे.

एखाद्या हिंदी सस्पेन्स चित्रपटाला साजेल अशी थरारक आणि नाट्यमय घटना मंगळवेढ्यात घडली. मंगळवेढ्यातील पाटकळमध्ये एका विवाहितेचा जळीत अवस्थेतील मृतदेह सापडला. घरासमोरील गवताच्या गंजीत जळालेल्या अवस्थेत सापडलेल्या या मृतदेहामुळे घरातील विवाहित सूनेनेच आत्महत्या केल्याचे सर्वांना वाटले. या मुलीच्या माहेरकडील कुटुंबीय या ठिकाणी आले. आपल्या मुलीची आत्महत्या नसून तिची हत्या झाल्याचा आरोप विवाहितेच्या कुटुंबाने पोलिसांकडे केला. पोलिसांनी तपास सुरू करताच त्यांना ही आत्महत्या नसून खून असल्याचा संशय येऊ लागला. त्यातच या विवाहितेचा फोन तिच्या अंगावर जळालेल्या अवस्थेत सापडल्याने पोलिसांचा संशय बळावला.

या फोनची सीडीआर चेक केल्यानंतर त्यांना एका तरुणावर संशय आला. पोलिसांनी लगेच या तरुणाला ताब्यात घेऊन त्याची चौकशी सुरू केली. सुरुवातीला या प्रियकराने आपणच या विवाहितेची हत्या केल्याचे सांगितले. यानंतर पोलिसांनी त्याला घटनास्थळी घेऊन गेल्यावर खरी घटना सांगितली. ज्या विवाहितेची हत्या झाली आहे ती मेलेली नसून जिवंत आहे अशी माहिती त्याने दिल्यानंतर पोलिसही बुचकळ्यात पडले.

मयत महिला बोलू लागली व्हिडिओ कॉलवर

यानंतर प्रियकरास त्या विवाहितेला व्हिडीओ कॉल करण्यास सांगण्यात आले. तर दुसऱ्या बाजूने ती विवाहिताच बोलू लागली आणि पोलिसांना धक्का बसला. पोलिसांनी तातडीने हा प्रियकर आणि कराड येथे गेलेली ती विवाहिता यांना ताब्यात घेतले आणि संपूर्ण खुनाचा उलगडा झाला.

नेमकं काय घडलं?

मंगळवेढा तालुक्यातील पाटकळ गावात नागेश सावंत आणि त्यांची पत्नी किरण राहत होते. 14 जुलै रोजी पहाटेच्या सुमारास किरण या 23 वर्षीय विवाहितेने आपल्या शेतातील कडब्याच्या गंजीत स्वतःला पेटवून घेतल्याच चित्र निर्माण करण्यात आलं. या घटनेनंतर किरणचा नवरा नागेश हा पत्नी वियोगाने रडत होता. त्याचवेळी किरणचे वडील देखील घटनास्थळी पोहोचले. किरणच्या वडिलांनाही आपल्या मुलीचा मृतदेह ओळखता आला नाही. किरणच्या वडिलांनी तात्काळ पोलिसांना आपल्या मुलीच्या मृत्यूबद्दल चौकशी करण्याची विनंती केली. किरणने आत्महत्या केली नसून तिची हत्या झाली असल्याचा संशय तिच्या माहेरच्यांनी व्यक्त केला.

याबाबत पोलिसांनी तपास सुरू केला. यातील विवाहिता किरण सावंत आणि तिचा प्रियकर 20 वर्षीय निशांत सावंत यांचे काही महिन्यापासून प्रेम प्रकरण सुरू होते. विशेष म्हणजे या विवाहितेला दोन वर्षाची गोड मुलगी देखील आहे. आपण दोघे कायमचे पळून जायचे असे या दोघांनी ठरवले आणि त्यातूनच ही भयानक खुनाचा कट रचला गेला.

यामध्ये किरण हिने आत्महत्या केल्याचा बनाव रचायचा, यासाठी गवताच्या गंजीत पेटवून मृत्यू झाल्याचे दाखवायचे असे ठरले. मात्र यासाठी कोणाचातरी मृतदेह असणे आवश्यक असल्याने किरण आणि निशांत यांनी बेवारस वेडसर महिलेचा शोध सुरू केला. आठ दिवसांच्या शोधानंतर पंढरपूरच्या गोपाळपूर जवळ एक वेडसर महिला तिच्या मुलाच्या शोधात फिरत असल्याचे निशांत याला दिसले. त्याने तिला तिच्या मुलाला शोधून देतो असे सांगून पाटकळ येथील सावंत वस्ती येथे घेऊन आला. दोन दिवसापूर्वी तिचा गळा दाबून खून करून घटनेदिवशी या गवताच्या गंजीत तिचा मृतदेह ठेवला आणि गवताची गंजी पेटवून दिली. यावेळी त्यांनी किरणचा मोबाईल या मृत महिलेच्या अंगावर ठेवला.

रात्री अडीच वाजण्याच्या सुमाराला गवताची गंजी पेटवण्यापूर्वी किरणला घरातून बाहेर बोलावले आणि डाळिंबाच्या बागेत लपायला सांगितले. यानंतर गंजी पेटवून निशांत निघून गेला. आग भडकलेली पाहताच परिसरातील ग्रामस्थ आग विझवायला आले . यात निशांत ही सामील होता. या गंजीमध्ये एका महिलेचा मृतदेह दिसल्याने किरण हिनेच आत्महत्या केली असे सर्वांना वाटले.

मात्र किरणच्या वडिलांना संशय आल्याने पोलिसांनी तपास सुरू केला आणि या जळालेल्या मोबाईलवरून पोलिसांना संशय वाढला. सुरुवातीला पतीची चौकशी केल्यानंतर पोलिसांना यात त्याचा हात नसल्याचे दिसले. नंतर मोबाईल सीडीआर वरून निशांत पर्यंत पोलिस पोचले आणि निशांतने किरणच्या मदतीने केलेल्या या प्रकरणाचा उलगडा केला.

सध्या विवाहिता किरण आणि निशांत पोलिसांच्या ताब्यात असून त्यांच्यावर खुनाचा गुन्हा दाखल करण्यात आला आहे. मात्र स्वतःचे विवाहबाह्य संबंध झाकून कायमचे मजेत जीवन जगण्यासाठी एका निष्पाप वेडसर महिलेची हत्या करणाऱ्या या जोडीला पोलिसांनी त्यांचा इंगा दाखवत या प्रकरणाचा उलगडा केला.

---------------------