पुणे पोलिसांची धडाकेबाज कारवाई
शिवशाही वृत्तसेवा, शिरूर (प्रतिनिधी फैजल पठाण)
३० मे २०२५: वैष्णवी हगवणे हुंडाबळी प्रकरणात मोठी घडामोड समोर आली आहे. नेपाळच्या सीमेवरून आरोपी निलेश चव्हाण याला पुणे पोलिसांनी ताब्यात घेतले आहे. या धडाकेबाज कारवाईमुळे या संवेदनशील प्रकरणात आता अधिक तपासाला गती मिळण्याची शक्यता आहे.
पोलिस सूत्रांनुसार, आरोपी निलेश चव्हाण हा गेल्या काही दिवसांपासून फरार होता आणि त्याचा शोध घेण्यासाठी विशेष तपास पथक तयार करण्यात आले होते. आंतरराष्ट्रीय सीमेवर देखील चौकशी वाढवण्यात आली होती. अखेर पुणे पोलिसांनी नेपाळ सीमा ओलांडण्याच्या प्रयत्नात असलेल्या निलेशला अटक केली. वैष्णवी हगवणे हिचा मृत्यू हा हुंड्याच्या मागणीमुळे झाल्याचा आरोप असून, या प्रकरणाने संपूर्ण राज्यात खळबळ उडवून दिली होती. या प्रकरणात पोलिसांनी आधीच काही जणांना अटक केली असून, निलेश हा प्रमुख आरोपी असल्याचे सांगण्यात येते.
पोलिस उपायुक्तांनी दिलेल्या माहितीनुसार, “ही कारवाई अत्यंत गुंतागुंतीची होती. आंतरराष्ट्रीय पातळीवर समन्वय साधत आरोपीला अटक करण्यात यश आले आहे. या प्रकरणात आणखी काही महत्त्वाचे खुलासे लवकरच अपेक्षित आहेत.”प्रकरणाच्या पुढील तपासासाठी निलेश चव्हाणला पुण्यात आणण्यात येत आहे. पुणे पोलिसांच्या या वेगवान आणि कौशल्यपूर्ण कारवाईचे सर्वत्र कौतुक होत आहे.
---------------------
गूगल न्यूज वर शिवशाही फॉलो करा
इथे क्लिक करून करून शिवशाही न्यूज टेलीग्राम चॅनल सबस्क्राईब करा
