ओझर्डे (ता. वाई) येथील बेपत्ता २१ वर्षीय पदवीधर तरुणाची विहिरीत उडी घेऊन आत्महत्या

तीन दिवसांनंतर मृतदेह सापडला

Suicide by jumping into a well, Satara, wai, shivshahi news.

शिवशाही वृत्तसेवा, वाई (प्रतिनिधी शुभम कोदे)

ओझर्डे (ता. वाई) येथील तीन दिवसांपासून बेपत्ता असलेला पदवीधर तरुण रोहन राजेंद्र शेलार (वय २१) याचा मृतदेह विहिरीत आढळून आला असून, त्याने आत्महत्या केल्याची निष्पन्न झाले आहे. भुईंज-पांगारा रस्त्यावरील शिवारातील एका शेतातील विहिरीत त्याचा मृतदेह तरंगताना आढळून आल्यानंतर ही दुर्दैवी घटना समोर आली. रोहनच्या अशा अचानक जाण्याने संपूर्ण ओझर्डे परिसरावर शोककळा पसरली असून, आत्महत्येचे कारण अद्याप समोर न आल्याने विविध चर्चांना उधाण आले आहे.

नेमकी घटना काय?

मिळालेल्या माहितीनुसार, रोहन शेलार हा गत शुक्रवारी रक्षाबंधनादिवशी सकाळी दहाच्या सुमारास अंगात लाल रंगाचा टी-शर्ट परिधान करून घरातून बाहेर पडला होता. घरातून बाहेर पडताना त्याने आईला घट्ट मिठी मारली होती. असा हृदयद्रावक आक्रोश त्याची आई करत असून, त्याची ती मिठीच अखेर शेवटची मिठी ठरली. लहानाचा मोठा केलेला मुलाने असे पाऊल उचलल्यामुळे उपस्थितांचे डोळे पाणावले.

बराच वेळ उलटूनही तो घरी न परतल्याने नातेवाईकांनी त्याचा सर्वत्र शोध सुरू केला. सोशल मीडियावर त्याच्या बेपत्ता झाल्याचे संदेशही मोठ्या प्रमाणावर प्रसारित करण्यात आले होते. दरम्यान, तीन दिवसांनंतर ओझर्डे गावच्या हद्दीतील पांगारा शिवारात रावता बळवंत फरांदे यांच्या शेतातील विहिरीत एक मृतदेह तरंगताना ग्रामस्थांच्या निदर्शनास आला. स्थानिकांनी तत्काळ याची माहिती पोलिसांना दिली. पोलिसांनी घटनास्थळी पोहोचून मृतदेह विहिरीतून बाहेर काढला असता, तो बेपत्ता रोहन शेलार याचाच असल्याचे निष्पन्न झाले.

हुशार, मनमिळाऊ अन् सोमेश्वर मंदिराचा निष्ठावंत सेवेकरी

रोहनने वाई येथील प्रतिष्ठित किसनवीर महाविद्यालयातून नुकतीच बी.एस्सी. (B.Sc.) पदवी चांगल्या गुणांसह पूर्ण केली होती. अभ्यासात अत्यंत हुशार, शांत आणि संयमी स्वभाव असलेला रोहन श्री क्षेत्र सोमेश्वर मंदिरामध्ये नियमित सेवेकरी म्हणूनही सक्रिय असायचा. धार्मिक व सामाजिक कार्यात नेहमी अग्रेसर राहणाऱ्या एका सुशिक्षित तरुणाने इतके टोकाचे पाऊल का उचलले, याविषयी संपूर्ण तालुक्यात आश्चर्य व हळहळ व्यक्त होत आहे.

भुईंज पोलिसांकडून कसून तपास सुरू

या घटनेची माहिती मिळताच भुईंज पोलीस ठाण्याचे पोलीस निरीक्षक पृथ्वीराज ताटे यांच्या मार्गदर्शनाखाली परिविक्षाधीन पोलीस डी.वाय.एस.पी पूनम झगडे आणि ओझर्डे बीटचे अंमलदार यांनी घटनास्थळाचा पंचनामा करून मृतदेह उत्तरीय तपासणीसाठी पाठवला. या प्रकरणी भुईंज पोलिसात अकस्मात मृत्यूची नोंद करण्यात आली असून, आत्महत्येमागील नेमके कारण शोधण्यासाठी पोलीस अधिक तपास करत आहेत.

तरुणांमधील सुप्त मानसिक तणाव व नैराश्य — चिंतेची बाब

या घटनेच्या निमित्ताने उच्चशिक्षित आणि शांत स्वभावाच्या तरुणांमध्ये वाढत असलेल्या मानसिक ताणाचा व नैराश्याचा प्रश्न पुन्हा ऐरणीवर आला आहे:

अबोल घुसमट: अनेकदा शांत आणि संकोची स्वभावाचे तरुण आपल्या मनावरील करिअरची चिंता, भविष्याची अनिश्चितता किंवा वैयक्तिक तणाव कोणाशीही शेअर करत नाहीत.

संवादाची निकड: घरात किंवा मित्रमंडळीत तरुणांशी सतत मोकळा संवाद ठेवणे अत्यंत गरजेचे बनले आहे, जेणेकरून त्यांच्या मनावरील ताण वेळेत ओळखून त्यांना मानसिक आधार देता येईल.

सोमेश्वर येथे शोकाकुल वातावरणात अंत्यसंस्कार

रोहनच्या कुटुंबात फक्त तो आणि त्याचा मोठा भाऊ हे दोघे होते.

रोहनच्या पश्चात आई, वडील, मोठा भाऊ पुणे येथे नोकरी ला असून सोबत आणि आजी असा परिवार आहे. शवविच्छेदनानंतर मृतदेह कुटुंबीयांच्या ताब्यात देण्यात आला. श्री क्षेत्र सोमेश्वर (ओझर्डे) येथे अत्यंत शोकाकुल आणि भावुक वातावरणात त्याच्या पार्थिवावर अंत्यसंस्कार करण्यात आले. एका होतकरू आणि सेवेकरी तरुणाच्या अकाली निधनाने ओझर्डे गावासह संपूर्ण परिसरात हळहळ व्यक्त होत आहे.

-----------------