यशाचे शिखर - माळीवाडगावचे सुपुत्र डॉ. केदार काळवणे यांची सहयोगी प्राध्यापक पदी निवड

जिद्द, चिकाटी आणि कष्टाच्या जोरावर ही डिग्री प्राप्त केली.

Selection for the post of Associate Professor, Chhatrapati Sambhaji Nagar, vaijapur, shivshahi news.

शिवशाही वृत्तसेवा, वैजापूर (प्रतिनिधी अनिल सूर्यवंशी)

जिद्द, चिकाटी आणि कष्टाच्या जोरावर ग्रामीण भागातील तरुणही यशाचे उत्तुंग शिखर गाठू शकतात, याचाच प्रत्यय पुन्हा एकदा आला आहे. वैजापूर तालुक्यातील माळीवाडगाव येथील शेतकरी कुटुंबातील सुपुत्र डॉ. केदारनाथ काळवणे यांची महाराष्ट्र लोकसेवा आयोगामार्फत (MPSC) ‘सहयोगी प्राध्यापक’ म्हणून निवड झाली आहे. त्यांच्या या यशामुळे संपूर्ण तालुक्यातून अभिनंदनाचा वर्षाव होत आहे.

शैक्षणिक प्रवास आणि संघर्ष

डॉ. काळवणे यांचे प्राथमिक व माध्यमिक शिक्षण माळीवाडगावच्या जिल्हा परिषद शाळेत झाले. त्यानंतर त्यांनी उच्च माध्यमिक शिक्षण कन्नड येथे पूर्ण केले. देवगाव येथून बी.ए.ची पदवी घेतल्यानंतर त्यांनी डॉ. बाबासाहेब आंबेडकर मराठवाडा विद्यापीठातून एम.ए. (मराठी) पूर्ण केले. विशेष म्हणजे, एम.ए. परीक्षेत त्यांनी विद्यापीठाच्या गुणवत्ता यादीत द्वितीय क्रमांक पटकावला होता. २०१५ मध्ये त्यांनी 'ग्रामीण साहित्याच्या आकलनाचा पुनर्विचार' या विषयावर आपली पीएच.डी. पूर्ण केली.

अनुभव आणि प्रशासकीय कौशल्य

डॉ. काळवणे यांनी एप्रिल २०११ ते जुलै २०२२ या काळात कळंब (जि. उस्मानाबाद) येथील शिक्षण महर्षी ज्ञानदेव मोहेकर महाविद्यालयात सहायक प्राध्यापक म्हणून काम पाहिले. सध्या ते पुण्यश्लोक अहिल्यादेवी होळकर सोलापूर विद्यापीठात 'विद्यार्थी विकास विभागाचे संचालक' म्हणून प्रतिनियुक्तीवर कार्यरत आहेत.

त्यांच्या कार्यकाळात सोलापूर विद्यापीठाने सांस्कृतिक आणि क्रीडा क्षेत्रात ऐतिहासिक कामगिरी केली आहे:

युवा महोत्सव: महाराष्ट्रात सर्वाधिक ३९ कलाप्रकारांचा समावेश असलेला युवा महोत्सव यशस्वीपणे आयोजित करण्याचा मान त्यांना जातो.

ऐतिहासिक यश: त्यांच्या मार्गदर्शनाखाली विद्यापीठाने ३९ व्या दक्षिण पश्चिम विभागीय युवा महोत्सवात (म्हैसूर) १३ पारितोषिके आणि २ गटांत सर्वसाधारण विजेतेपद मिळवून सर्वोच्च कामगिरी केली.

क्रीडा क्षेत्र: क्रीडा विभागाचा कार्यभार सांभाळताना एकाच वर्षात (२०२३-२४) ३४ पदके जिंकण्याचा विद्यापीठाचा विक्रम त्यांच्याच नावावर आहे.

लेखन आणि साहित्य सेवा

केवळ एक उत्तम प्रशासकच नव्हे, तर एक संवेदनशील लेखक आणि समीक्षक म्हणूनही डॉ. काळवणे यांची ओळख आहे.

प्रकाशित ग्रंथ: ‘अनिवार्य मराठी व्याकरण लेखन व आकलन’, ‘ग्रामीण साहित्य: संकल्पना आणि समीक्षा’ आणि ‘कल आणि कस’ हे त्यांचे समीक्षा ग्रंथ प्रसिद्ध आहेत.

संपादन: दीनमित्रकार मुकुंदराव पाटील यांच्या समग्र अग्रलेखांच्या १० खंडांच्या प्रकल्प संपादनात त्यांनी मोलाचा सहभाग नोंदवला आहे.

परस्कार: त्यांना शिवपूर प्रतिष्ठानचा ‘छत्रपती संभाजी महाराज युवा साहित्य पुरस्कार’, ‘भि.ग. रोहणारे ग्रामीण साहित्य पुरस्कार’ आणि ‘प्राचार्य म.भि. चिटणीस वाड्मय पुरस्कार’ अशा विविध मानाच्या पुरस्कारांनी सन्मानित करण्यात आले आहे.

ग्रामीण भागातील एका शेतकरी कुटुंबातून येऊन, सलग परिश्रम आणि अभ्यासाच्या बळावर डॉ. केदार काळवणे यांनी मिळवलेले हे यश राज्यातील इतर ग्रामीण विद्यार्थ्यांसाठी प्रेरणादायी ठरणार आहे. त्यांच्या निवडीबद्दल शिक्षण क्षेत्रातून आणि माळीवाडगाव ग्रामस्थांकडून मोठे कौतुक होत आहे.

-----------------------